काठमाडौँ । आगामी स्थानीय निर्वाचन २०७९ का लागि निर्वाचन आयोगले ४६ जिल्लाको मतपत्र छापेको छ । आयोगले सोमबार नियमित पत्रकार सम्मेलन गर्दै ४६ जिल्लाका लागि मतपत्र तयार भइसकेको जानकारी दिएको हो ।

आयोगका प्रवक्ता शालिग्राम शर्मा पौडेलका अनुसार ४६ जिल्लाका लागि मतपत्र छपाइको काम सकिएको बताउनुभयो । ती जिल्लाका लागि ९५ लाख थान मतपत्र छापिइ सकिएको उहाँको भनाई छ ।

निर्वाचन आयोगले जनक शिक्षा सामग्री केन्द्रमा मतपत्र छपाइ गरिरहेको छ । सुरुमा दुर्गमका जिल्लाका लागि र पछि सुगमका जिल्लाका लागि मतपत्र छपाइको काम भइरहेको हो ।

आयोगले स्थानीय तह निर्वाचनका लागि १ करोड ९४ लाख थान मतपत्र छाप्ने तयारी गरेको छ । यसपटकको स्थानीय तहमा मतदाता संख्या १ करोड ७७ लाख ३३ हजार ७२३ जना रहेका छन् ।