चितवन । अवको नेतृत्व युवाले गर्नुपर्नेमा जोड दिँदै २९ वर्षिय बिरेन्द्र केसीले भरतपुर महानगरपालिकको उपमेयरमा दाबी गर्नुभएको छ ।
आज पत्रकार सम्मेलन गरी भरतपुर १२ निवासी केसीले नेपाली काँग्रेसको तर्फबाट उपमेयरमा उम्मेदवारी रहेको बताउँदै आफूलाई पार्टीले टिकट दिने विश्वास व्यक्त गर्नुभयो ।
परिवारनै राजनीतिक पुष्ठभूमिमा रहेको र आफूपनि विद्यार्थी राजनीति हुँदै अहिले नेपाल तरुण दलको जिल्ला सदस्यमा रहेर निरन्तर नेपाली काँग्रेसमा सक्रिय भएकाले अव युवाले नेतृत्व गर्नेुपर्ने बताउँनुभयो ।
काँग्रेसको केन्द्रमै गगन थापा, विश्वप्रकाश शर्मा लगायतका युवाहरुको नेतृत्व आउँदा स्थानीय तहमा पनि युवाहरु आउनुपर्नेमा उहाँको जोड थियो । केसी अहिले भरतपुर १२ को नेपाल तरुण दल अध्यक्ष, वडा समितिको सल्लाहकार र नेपाल तरुण दल चितवनको जिल्ला सदस्य हुनुहुन्छ ।
नेपाली काँग्रेस भरतपुर महानगर समितिमा २४ जनाले आकांक्षा व्यक्त गर्दा केसी सवैभन्दा कान्छो र युवा हुनुहुन्छ । समय अनुसार नेतृत्व परिवर्तन हुँदै जानुपर्ने बताउँदै उहाँले युवाहरु सक्षम, अध्ययनशील, पार्टी संगठन निर्माण देखि देशको निर्माणमा महत्वपूर्ण भूमिका हुने भन्दै स्थानीय तहको नेतृत्वमा आफु आउन चाहेको बताउनुभयो ।
साथै युवाहरुलाई नेतृत्व हस्तान्तरण गर्न सके काँग्रेसको सिद्धान्त समेत दिगोपना हुने निश्चित रहेकाले चितवन र भरतपुरमा रहेका युवाहरुलाई समेटेर लैजान आफूले दाबी पेश गरेको बताउनुभयो ।
आफू उपमेयरमा निर्वाचित भए महानगरको मुहार फेर्ने दाबी उहाँको छ । भौतिक विकास सँगै अन्य क्षेत्रलाई प्राथमिकता दिन नसक्दा युवाहरु बेरोजगार हुनुपरेको भन्दै सवै क्षेत्रको समृद्धिका लागि आफ्नो विशेष सक्रियता रहने केसीको भनाई छ । महानगरलाई स्मार्ट सिटीको रुपमा विकास गर्दै पर्यटन,कृषि, औद्योगिक क्षेत्र आदिको विकास गर्न सवैसँग हातेमालो गरी अघि बढ्ने उहाँले बताउनुभयो ।
नेपाली काँग्रेसको विधि, विद्यानमा रही नीति र नियम पालना गर्ने बताउँदै यस पटक टिकट दिएर उपमेयरमा निर्वाचित हुने विश्वास उहाँको थियो । उपमेयरमा नाम दर्ता गरेसँगै सवै तहका नेता कार्यकर्ताले हौसला र साथ दिइरहेको दाबी गर्दै केसीले भन्नुभयो,“पार्टीले टिकट दिनेमा विश्वस्त छु । राजनीतिसँगै विभिन्न सामाजिक संघ संस्थासँग आवद्ध भएर काम गर्दै युवाहरुको चाहाना अनुसार काम गर्नका लागि कुनै न कुनै जिम्मेवारीमा हुनुपर्ने आत्मबोध भएर उपमेयरमा दाबी गरेको छु । ”
