चितवन । चितवनको भरतपुर महानगरपालिकाका २९ वटै काँग्रेस वडा सभापतिहरु गठवन्धनको बिपक्षमा उभिएका छन् । पुनः माओबादी केन्द्रलाई भरतपुरको मेयर दिने गोप्य निर्णय गरेको सुइँको पाएपछि उनीहरु आज बैठक बसेर गठवन्धन नै स्वीकार्य नहुने निर्णय गरेका हुन् ।
काँग्रेस चितवनको पार्टी कार्यालय कमलनगर नारायणगढमा जेष्ठ सभापति वडा नम्बर १९ का आशमान तामाङको अध्यक्षतामा बैठक सम्पन्न गरी गठवन्धन कुनै हालतमा स्वीकार्य नहुने र सोही अनुसार केन्द्रमा निर्णय लिन उनीहरुको माग छ ।
गठवन्धन नमान्ने निर्णय गरेर तत्काल केन्द्रमा पठाउन अनुरोध सहित उनीहरुले जिल्ला सभापति राजेश्वर खनाललाई हस्तान्तरण गरेका छन । निर्णय बुझ्दै जिल्ला सभापति खनालले आफ्नो चाहाना पनि वडा सभापतिहरुको निर्णयसंग मेल खाने भन्दै निर्णय हुबहु केन्द्रमा पठाउने प्रतिवद्धता व्यक्त गर्नुभयो ।
केन्द्र, जिल्ला र महानगरले गठवन्धन गर्ने निर्णय गरेपनि वडा सभापतिहरु कुनै पनि गठवन्धनको पक्षमा नरहने निश्कर्षमा पुगेका छन । गत चैत्र २० गते ५ दलीय गठवन्धन अनुसार नै तालमेल गर्ने निर्णयमा पार्टी समेत संलग्न भएकोमा असन्तुष्टि जनाउँदै वडा सभापतिहरुले नेतृत्वको ध्यानाकर्षण गराएका छन । वडा सभापतिहरुको संयुक्त निर्णय विपिरित गठवन्धन गरिए भरतपुर महानगरमा मेयर, उप–मेयर र सबै वडामा अध्यक्षसहितका ५ जना उमेदवार खडा गर्ने चेतावनी उनीहरुको छ । साथै वडा सभापतिहरुले आफुहरुले भनेको नभए गठवन्धनका सबै उमेदवारहरुलाई बहिस्कार गर्ने निर्णय पनि गरेका छन ।
आज मात्रै विभिन्न संचारमाध्यमहरुमा भरतपुरको मेयर माओवादीलाई दिन काँग्रेस सभापति शेरवहादुर देउवा राजी भएको समाचार आएको थियो । तर घटनाचक्रसँग कुराकानी गर्दै चितवन काँग्रेसका सपभाति राजेश्वर खनालले आफूलाई त्यो वारे कुनै जानकारी नआएको र केही दिन अगाडिमात्रै केन्द्रमा गएर काँग्रेसले मेयर पाउनुपर्ने माग राखेको बताउँदै त्यसैको कार्यान्वयनमा आफू लागिरहेको बताउनुभएको थियो ।
