चितवन । नेकपा एमाले चितवनले भरतपुर महानगरपालिकाको मेयरमा प्रदेश सांसद विजय सुवेदीलाई उमेदवार बनाउने निर्णय गरेको छ । आज पार्टी कार्यालय चितवनमा एक कार्यक्रमगरी सुवेदीलाई मेयरमा उठाउने निर्णय गरेर घोषणा गरिएको हो ।
पार्टीका उप–महासचिव प्रदिप ज्ञवालीसमेतको उपस्थितिमा भएको महानगर कमिटिको बैठकले सुवेदीलाई उम्मेदवार बनाउने निर्णय गरेको हो । सुवेदी चितवन निर्वाचन क्षेत्र नम्बर २ ‘ख’ बाट प्रदेश सभामा निर्वाचित हुनुभएको थियो ।
भरतपुरको मेयरमा एमालेबाट पोलिटव्युरो सदस्य देविप्रसाद ज्ञवाली र कृष्णभक्त पोखरेलको नाम पनि चर्चामा थियो । २०७४ को निर्वाचनमा अन्तिम सयम मतपत्र च्यातिएपछि भएको पुन निर्वाचनपछि उहाँलाई रेनु दाहालले हराउनुभएको थियो ।
मतगणनाको अन्तिम समय मतपत्र च्यातेपछि हार्नुपरेको बताउँदै आएको नेकपा एमाले चितवनले पीडालाई परिपूर्ति गर्नपनि ज्ञवाली मेयर उठाउने चर्चावीच ज्ञवालीलेनै सुवेदीलाई मेयर पदको उम्मेदवार बन्न प्रस्ताव गर्नुभएको थियो । पोलिटब्युरो सदस्य ज्ञवालीले प्रस्ताव र नेता कृष्णभक्त पोखरेलले समर्थन गर्नुभएपछि आज घोषणा गरिएको हो ।
बागमती प्रदेशमा अष्ठलक्ष्मी शाक्य नेतृत्वको सरकारमा सामाजिक विकास मन्त्री हुनुभएका सुवेदीले नेकपा एमाले चितवनको तीन पटक पार्टी अध्यक्ष भएर जिम्मेवारी निभाइसक्नुभएको छ ।मेयरको उम्मेद्वार घोषणा गरिएका सुवेदी वृहत चितवनको गुरूयोजना निर्माणका सक्रिय व्यक्ति हुनुहुन्छ भने चितवनमा विकासको भिजन भएका नेताका रूपमा परिचित हुनुहुन्छ। सुवेदीले भरतपुर अस्पतालको अध्यक्ष हुँदा उल्लेख्य काम गर्नुभएको र आगामी चुनावमा जित निश्चित रहेको नेताहरुको दाबी छ ।
भरतपुर महानगरपालिका १२ का स्थायी वासिन्दा उहाँ लोकप्रिय नेता मानिनुहुन्छ ।
एमालेले भरतपुर महानगरमा राप्रपालगायतका दलहरुसँग तालमेल गर्ने तयारी गरेका कारण उपमेयरको पद भने खाली राखेको छ ।
