चितवन । चितवनको भरतपुर महानगर २२ पटिहानीको कभर्डहलमा २१ औँ जिल्ला स्तरीय तेक्वान्दो प्रतियोगिता शनिवार सम्पन्न भएको छ ।
राष्ट्रिय तेक्वान्दो जिल्ला संघ चितवनको प्राविधिक सहयोगमा लियो क्लव अफ बैद्धिकनगरको आयोजनामा कार्यक्रम भएको हो ।
भिटो एजुकेशन चितवनको प्रमुख स्पोन्सर रहेको कार्यक्रममा जिल्लाभरबाट १२२ जना खेलाडीहरुले सहभागीता जनाएका थिए ।
लियो कुशल सापकोटाको अध्यक्षतामा सम्पन्न कार्यक्रममा २२ का वडाअध्यक्ष विष्णुराज महतो प्रमुख अतिथि र राष्ट्रिय तेक्वान्दो संघ चितवनका अध्यक्ष एवम् महानगर खेलकुद विकास समितिका अध्यक्ष विकास श्रेष्ठ विशिष्ट अतिथि रहनुभएको थियो ।
रेफ्री सन्तोष मर्दनीयका अनुसार जिल्लाभरबाट छनौटमा परेका खेलाडीहरुबीच प्रतिस्पर्धा भएको हो । जसमा ६ तौल समूह ४५,४८ र ५१ केजी पुरुष तथा ४२,४४ र ४६ केजीतर्फ महिलाहरुबीच प्रतिस्पर्धा भएको हो ।
प्रतियोगितामा ४५ केजी पुरुषमा सम्राट दराई, ४८ केजीमा सुजन तामाङ, ५१ केजीमा रस्मीत परियार प्रथम हुँदै शिल्ड मेडल र प्रमाणपत्र प्राप्त गर्न सफल भएका छन् ।
महिलातर्फ ३२ केजीमा दीक्षा चौधरी, ४४ केजीमा रोषनी श्रेष्ठ, ४६ केजीमा प्रतिभा श्रेष्ठ प्रथम हुँदै शिल्ड,मेडल र प्रमाणपत्र प्राप्त गर्नुभएको छ ।
बेष्ट फाइटर पुरुषतर्फ सुजन तामाङ र बेष्ट फाइटर महिलातर्फको उपाधि प्रतिभा श्रेष्ठले प्राप्त गर्नुभएको छ ।
त्यस्तै टिमतर्फ गैँडाकोट तेक्वान्दो डोजाङ प्रथम हुन सफल भएको छ भने एके ४७ तेक्वान्दो डोजाङ द्धितीय र बारघरे तेक्वान्दो डोजाङ तृतीय भएको छ ।
त्यस्तै पुम्से विधामा पुम्से नम्वर ९ तर्फ माडीका सुरेश तामाङ प्रथम, बाह्रघरेका स्वरुप कार्की दोस्रो,एके फोर्टीसेभेन र माडीका सिजन क्षेत्री तृतीय भएका छन् ।
पुम्से नम्वर ८ तर्फ कृष्णपुरका रमेश तामाङ प्रथम, पिन्स रसाइली दोस्रो, गैँडाकोटका रोनी क्षेत्री र माडीका सुरेश तामाङ तेस्रो हुनुभएको छ ।
महिलातर्फ पुम्से ८ तर्फ कृष्णपुरका ऋतु तामाङ प्रथम, गैँडाकोटका खुसी कार्की दोस्रो, माडीका कस्तीना महतो र करिना नगरकोटी तेस्रो हुनुभएको छ ।
पुम्से नम्वर ९ तर्फ भने रोसनी श्रेष्ठ प्रथम हुनुभएको छ ।
तेक्वान्दो खेलको विकास र यसतर्फ पनि खेलाडीहरुको भविष्य छ है भन्ने सन्देश दिन कार्यक्रम गरेको राष्ट्रिय तेक्वान्दो संघ चितवनका अध्यक्ष समेत रहनुभएका विकास श्रेष्ठको भनाई छ । लियो क्वलले खेल क्षेत्रको विकास गर्न यसरी आफूहरुसँग सहकार्य गरेर कार्यक्रम गरेकोप्रति आभार व्यक्त गर्नुभयो ।
