भरतपुर । चितवनमा हिजोदेखि टाइफाइड रोग विरुद्धको खोप अभियान सुरु भएको छ । १ लाख ९६ हजार ११ जनालाई खोप लगाउनेगरी अभियान सुरु भएको स्वाथ्य कार्यालय चितवनका निमित्त प्रमुख राम केसीले जानकारी दिनुभयो ।
जिल्लाका सबै वडा र स्थानीय तहमा हिजोदेखि खोप अभियान सञ्चालन भएको स्वास्थ्य कार्यालय चितवनले जानकारी दिएको छ । खोप अभियान बैशाख ४ गतेसम्म सञ्चालन हुनेछ ।
खोप अभियानमा १५ महिनादेखि १५ वर्ष उमेर मुनिका सबै बालबालिका समावेश हुनेछन् । विद्यालय र स्वास्थ्य संस्था मार्फत खोप प्रदान गरिने उहाँले जानकारी दिनुभयो । जिल्लाभर ५४० खोप केन्द्र राखिएको छ । भरतपुर महानगरपालिकामा २१४, रत्ननगर नगरपालिकामा ५८, खैरहनीमा ६२, राप्तीमा ६४, कालिका नगरपालिकामा ५३, माडी नगरपालिकामा ४१ र इच्छाकामना गाउँपालिकामा ४८ वटा खोप केन्द्र रहेका छन् ।
खोप केन्द्रहरुमा केन्द्रहरुमा ९४४ जना स्वास्थ्यकर्मी र १ हजार ३९४ जना स्वास्थ्य स्वयं सेवक खट्ने उहाँले जानकारी दिनुभयो । विश्व स्वास्थ्य संगठनले नेपालमा २०१७ सालमा नै टाइफाइड विरुद्धको खोप लगाउन सिफारिस गरेको थियो । तर, कोरोनाका कारण रोकिएको खोप अभियान पुन सुचारु गरिएको केसीले बताउनुभयो ।
यो खोप ९६ प्रतिशत प्रभावकारी रहेको दावि गरिएको छ । यो खोप जीवनमा एक पटक दिइने छ । यसलाई नियमित रुपमा नै सञ्चालन गर्ने केसीले बताउनुभयो । उच्च ज्वरो र अन्य खोप लगाएको १५ दिन नकटेका बालबालिकालाई खोप लगाउन नहुने उहाँले बताउनुभयो ।
भरतपुर महानगर उपप्रमुख पार्वती शाह ठकुरीको प्रमुख आतिथ्यतामा हिजो अभियानको सूरु गरिएको थियो । यो अवधिमा १ हजार ३९४ स्वयंसेविक खटिनेछन् ।
अभियान सम्पन्नपछि यस खोपलाई नियमित खोपको रुपमा सरकारले लागू गर्ने र त्यसपछि १५ महिना कटेका तर २ वर्ष मुनिका बालवालिकालाई यो खोप निरन्तर लगाइनेछ ।
