चितवन । स्थानीय निर्वाचन आउन ३५ दिन बाँकी छ । आजदेखि निर्वाचन अचारसंहिता लागू हुने निर्वाचन आयोगले जनाएको छ । चुनावमा गठवन्धन गरेर जाने भएपछि चितवनका काँग्रेस नेताहरु भरतपुरको मेयर नछाड्ने अडानलाई बलियो बनाउँदै लगेका छन् ।
जिल्लामा पटक पटक बैठक बसेर अन्तत भरतपुरको मेयर काँग्रेसले नछाड्ने निर्णयमा पुगेर उनीहरु केन्द्रमा गएका छन् ।
यस अघि बरिष्ठ नेता रामचन्द्र पौडेललाई भेटेर अडान नछाड्न आग्रह गरेका नेताहरु पार्टी सभापति शेरबहादुर देउवालाई भेटेका छन् ।
पार्टी सभापति शेर बहादुर देउवालाई भेटेर भरतपुर महानगपालिकाको मेयर नछाड्न दबाब दिएको काँग्रेस चितवनका सभापति राजेश्वर खनालले बताउनुभयो ।
खनाल नेतृत्वको टोलिले शुक्रबार साँझ प्रधानमन्त्री निवास बालुवाटार पुगेर भरतपुरको मेयर नछाड्न सभापति देउवालाई दबाब दिएका हुन् । सभापति खनाल नेतृत्वको टोलिमा केन्द्रिय सदस्यद्वय टेकप्रसाद गुरुङ र दिनेश कोइराला, निवर्तमान पार्टी सभापति जितनारायण श्रेष्ठ, पूर्व सांसद जगन्नाथ पौडेल, निवर्तमान जिल्ला सचिव उत्तम जोशी लगायतका नेताहरु सहभागि थिए ।
सो क्रममा भरतपुर महानगरबारे जिल्ला कार्यसमितिले गरेको निर्णय हस्तान्तरण गर्दै जिल्लाको अवस्थाबारे सभापति देउवालाई ब्रिफिङ गरिएको थियो । जिल्लाका नेताहरुको कुरो सुनेर प्रधानमन्त्री समेत रहनुभएका सभापति देउवाले सकारात्मक जवाफ दिएको नेताहरुको भनाई छ ।
