चितवन । चितवनकाे भरतपुरमा साइक्लिङ म्याराथन हुने भएकाे छ ।
प्रज्ञा स्मृति प्रतिष्ठान नेपालको आयाेजना र नेपाल साइक्लिङ संघकाे प्राविधिक सहयाेगमा चैत २६ देखि भरतपुरमा ‘प्रज्ञ स्मृति भरतपुर साइक्लिङ म्याराथन´ प्रतियोगिता हुने आज पत्रकारसम्मेलनगरि जानकारी दिएकाे हाे ।
प्रतियोगिता संयोजक सन्त कुमार दरैका अनुसार सम्पुर्ण पूर्व तयारी सकिएको छ । नारायणी नदि किनारमा प्रतिष्ठानका संरक्षक माओवादी केन्द्रका अध्यक्ष पुष्पकमल दाहाल प्रचण्डले उद्घाटन गर्ने र हालसम्म ८६ जनाले नाम दर्ता गराएकाे, त्यसमध्ये १२ जना महिला रहेकाे दरैले बताउनुभयो । दर्ता गराउन आउनेकाे संख्या बढ्नसक्ने छ।

प्रतियोगितामा पाँच विधा छन् । इलिट मेन १९ प्लस,इलिट वमेन १९ प्लस, मास्टर मेन ३० प्लस,ग्रयाण्ड मास्टर मेन ५० प्लस र चितवन विशेष हुन् । १९ वर्ष माथिका साइकल चलाउन जान्ने जाे काेही सहभागी हुन पाउने आयाेजकले जनाएको छ ।
प्रथम हुने १९ वर्ष माथिका महिला पुरुषलाई ४५ हजारका दरले, ३० वर्ष माथिकाे विधामा २५ हजार, ५० वर्ष माथिकाे विधामा २० हजार र चितवन स्पेशल विधामा महिला पुरुषलाई २०/२० हजार नगद पुरस्कार रहने आयाेजकले जनाएको छ।
प्रतियोगितामा १०आै स्थानसम्म आउनेलाई नगद पुरस्कारको व्यवस्था रहेकाे छ ।

भरतपुर महानगरमा निर्माण रिङ्गराेड सहितका सडक आयाेजना  साईकलमैत्री रहेकाे सन्देश दिन र वातावरण संरक्षणमा समेत टेवा पुर्याउने साईकलकाे प्रयाेग बढाउन प्रतियोगिता गराउन लागिएको आयाेजककाे भनाइ छ।
करिव २ घण्टाकाे प्रतियोगितामा लगभग ६५ कि.मि. दुरी रहेको छ । नारायणी तिरबाट शुरु भई भरतपुर महानगरपालिकाको विभिन्न भित्री सडकमा दौड, र्याली सहित पुन: नारायणी तिरमा आइ समापन हुनेछ ।

प्रतियोगितामा विजेता खेलाडीहरुलाई नगद, मेडल तथा प्रमाण पत्र वितरण गरिने छ । साथै विभिन्न व्यक्तिहरूलाई सम्मान गरिने आयाेजकले जनाएको छ । प्रतियोगिताको मुख्य उद्देश्य क्यान्सर पिडितलाई सहयोग गर्ने रहेको प्रतिष्ठानले जनायाे । प्रतियोगिताको कुल बजेट रकम रु. ४२ लाख ७३ हजार ३३५ र विजेता खेलाडीहरुलाई नगद पुरस्कारमा मात्रै रु. ५ लाख ९५ हजार खर्च हुनेछ ।
प्रतियोगितामा काठमाडौ सहित हेडाैंटा, पाेखरा, बारा, पर्सा, एपीएफबाट समेत सहभागीता रहनेछ।
विहान सात बजे प्रतियोगिता सुरु हुनेछ।
प्रचण्डकाे छाेरी ज्ञानु र छाेरा  प्रकाश दाहालकाे निधन भएपछि उहांहरुकाे स्मृतिमा प्रतिष्ठान बनाएकाे महानगर प्रमुख रेनु दाहालले बताउनुभयाे ।

शाेकलाई शक्तिमा बदल्दै समाजसेवामा लगाउन प्रतिष्ठान स्थापना भएकाे र याे पहिलाे आैपचारिक कार्यक्रम भएकाे समेत दाहालकाे भनाइ थियाे । साथै भरतपुरकाे रिङराेड अहिले ६६ किलोमिटर रहेपनि चांडै  ८८ किलोमिटर रिङराेडमा म्याराथन हुने दाबी गर्नुभयाे ।

प्रतियोगितामा माउन्टेन बाईक मात्रै प्रयाेग गर्न  पाईने र सहभागीकाे बीमा समेत आयाेजकले गरिदिने बताईएकाे छ।