चितवन । चितवनमा टाइफाइड खोप अभियान आजदेखि संचालन हुँदैछ । चैत २५ देखि वैशाख ४ गतेसम्म यो अभियान चलाइने स्वास्थ्य कार्यालय चितवनले जानकारी दिएको छ ।
टाइफाइडरोगविरुद्ध यो खोप १५ महिनादेखि १५ बर्ष उमेर समूहलाई लगाइने स्वास्थ्य कार्यालय चितवनका निमित्त प्रमुख रामकुमार केसीले जानकारी दिनुभयो । केसीका अनुसार चितवनमा ९५ प्रतिशत बढी लक्ष्य हासिल गर्नेगरी १ लाख ९६ हजार ११ जनालाई खोप लगाउने उहाँको भनाई छ । खोप लगाउने संख्या विद्यालयबाट मगाइएको र अभियानमा लक्षित वर्गलाई नछुटाउने गरी तयारी भइरहेको उहाँको भनाई छ ।
१ लाख ५९ हजार २४६ जना विद्यालयबाट र ३६ हजार ५६६ जना विद्यालयबाहिरबाट तथ्याङ्क लिएको र सोही अनुसार खोप लगाइने छ ।
जिल्लाका विभिन्न स्थानमा रहेका निजी र सरकारी विद्यालयमा गरी ५४० वटा खोप केन्द्र रहेको र ९४४ जना स्वास्थ्यकर्मी खोप लगाउन खटाइनेछ । १ हजार ३९४ जना स्वयंसेवक परिचालन गरिनेछ । २०० जना विद्यार्थी पुगेको विद्यालयमा खोप केन्द्र राखिएको र चाप अनुसार ९४४ खोप सेसन कायम गरिएको छ ।
जनस्वास्थ्य अधिकृत दिपक सुवेदीका अनुसार अभियान सम्पन्न पछि १५ महिनादेखि दुई वर्ष उमेर समूहका बालवालिकालाई टाइफाइड खोप नियमित रुपमा लगाउनेगरी सरकारको योजना रहेको बताउनुभयो ।
दुषित खाना र पानी र दिसा खाँदा यो रोग लाग्ने र उपचार पनि हुनेभएपनि समयमै लक्षण नहुँदा धेरैलाई सर्न सक्ने जोखिम रहेको सुवेदीको भनाई छ ।
भारतमा बनाइएको यो खोप लक्षित वर्गलाई शुन्य दशमलव ५ मिलिलिटर डोज दिइने र अहिले चितवनका लागि २८ हजार ९४४ डोज प्राप्त भइसकेको स्वास्थ्य कार्यालय चितवनले जानकारी दिएको छ । गम्भीर विरामी भएकाहरुलाई बाहेक र कुनै खोप लिइएको अवस्था छ भने १५ दिनको ग्याप राखेर यो खोप लिनुपर्ने बताइएको छ ।
