चितवन । नेकपा (एमाले)का पाेलिटब्युराे सदस्य  महेश बस्नेतले प्रचण्ड र माधव नेपालको राजनीतिक जीवनको अन्तिम टिकट काटिदिने चेतावनी दिनुभएको छ । बिहिबार भरतपुर विमानस्थलमा सञ्चारकर्मीहरुसँग कुराकानी गर्दै नेता बस्नेतले गठबन्धन गरेर एमालेलाई धम्काउन प्रचण्डले प्रयास गरिरहेकाे तर त्याे फलामकाे चिउरा चपाउनुसरह रहेकाे उहाको भनाइ थियाे  ।
‘प्रचण्ड र माधव नेपालको राजनीतिक जीवनको अन्तिम यात्राको टिकट काटिदिने भन्ने छ’, उहाँले भन्नुभयो । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ पिँध नभएको लोटा जस्तै भएको उहाँले टिप्पणी गर्नुभयो ।
छोरीलाई मेयर र बाबुलाई सांसद बनाएर नेपाली कांग्रेस नारायणी नदीमा क्रुजसिप चढ्न खोजेको हाे भनि उहाँले व्यंग्य समेत गर्नुभयो । गठबन्धनलाई धम्काउन एमालेलाई प्रयोग गर्न सजिलो नभएको भन्दै उहाँले चुनावमा बाबु छोरी मिलेर आएपनि साइजमा राख्ने बताउनुभयो । 
एमालेलाई एक्लै हराउन सकिँदैन भन्ने भएपछि कांग्रेस, माओवादी केन्द्र र नेकपा (एकिकृत समाजवादी) एक ठाउँमा आएको भन्दै उहाँले त्यहि डरले सत्तागठबन्धन चुनावसम्म जान लागेको बताउनुभयो । एमालेले एक्लै चुनावमा जाने बताएपनि स्थानीय तहको आवश्यकताका आधारमा अन्य दलसँग पनि तालमेल हुन सक्ने उहाँले बताउनुभयो ।