चितवन । बेरोजगारीको अवस्थालाई न्यूनिकरण गर्न इच्छाकामना गाउँपालिका ५ मुग्लिनमा भएको ३ दिने ईण्डियन कुक तालिम सम्पन्न भएको छ । गाउँपालिकाको सहयोग र होटल व्यवसायी संघ, चितवन ईच्छाकामना ईकाई समितिको आयोजनामा तालिम भएको थियो ।
समापन कार्यक्रमका प्रमुख अतिथि गाउँपालिका उपाध्यक्ष कृति कुमार श्रेष्ठले गाउँपालिकाले धेरै व्यवसायीक तालिमको आयोजना गरेको बताउनुभयो । तर तालिमपछि लिएका सीपको व्यवहारिक प्रयोग कम भएको भन्दै व्यवहारिक प्रयोगमा लगाउन आग्रह गर्नुभयो । रोजगारीको अवस्थालाई उकास्न यी तालिमले धेरै सहयोग गर्ने उहाँको भनाई थियो ।
होटल ब्यवसायीको माग र आवश्यकतालाई ध्यान दिएर तालिमको लागि आर्थिक सहयोग गरेको भन्दै होटल व्यवसायी संघ चितवनका अध्यक्ष दिलकुमार श्रेष्ठले गाउँपालिकालाई धन्यवाद दिनुभयो ।
होटल व्यवसायी संघ, चितवन ईच्छाकामना ईकाईका अध्यक्ष मिनबहादुर श्रेष्ठको अध्यक्षता भएको कार्यक्रममा विशिष्ट अतिथि होटल व्यवसायी संघ, चितवनका अध्यक्ष दिलकुमार श्रेष्ठ, इच्छाकामना गाउँपालिका वडा नं ५ का वडा अध्यक्ष मोदराज सिलवाल, अतिथिहरु वडा नम्बर ५ का वडा सदस्य एवं कार्यपालिका सदस्य निर्मला श्रेष्ठ ,होटल व्यवसायी संघ चितवनका सचिव रामबहादुर गुरुङ, होटल व्यवसायी संघ चितवनका पुर्व अध्यक्ष कमल शर्मा, निवर्तमान इकाईका अध्यक्ष राम पाण्डे लगायतको उपस्थिती थियो ।
तालिममा सहभागीहरुलाई प्रमुख अतिथि श्रेष्ठ,विशिष्ट अतिथि वडा अध्यक्ष मोदराज सिलवालले खादा लगाइ प्रमाणपत्र प्रदान गर्नुभएको थियो । तालिम प्रशिक्षकको रुपमा रमेश रानाभाट हुनुहुथ्यो ।
साथै समापन कार्यक्रममा १७ औ राष्ट्रिय तेक्वान्दो प्रतियोगितामा बागमति प्रदेश को प्रतिनिधित्व गर्दै दोस्रो स्थान हात पार्न सफल इच्छाकामना, मुग्लिन निवासी सुप्रिका गुरूङलाई सम्मान गरिएको थियो।
