काठमाडौँ । चुनाव आउन एक महिना नजिक रहदा निर्वाचन आयोगले मतपत्र छपाइको काम आजबाट सुरु गरिने जनाएको छ । २०७९ बैशाख ३० गते हुने निर्वाचन आउन ३९ दिन बाँकी छ ।

आयोगका प्रवक्ता शालिग्राम शर्मा पौडेलले अहिलेसम्म १ लाख ८० हजार नमूना मतपत्र छापिइसकेकाले आजदेखि सक्कली मतपत्रको छपाइ कार्य सुरु हुने जानकारी दिनुभएको हो ।

दुर्गम ठाउँमा मतपत्र पुग्नका लागि धेरै समय लाग्ने भएकाले सुरुमा दुर्गम ठाउँका लागि मतपत्र छापिने र कुल मतपत्रमध्ये ८ देखि २५ प्रतिशतसम्म जगेडा मतपत्र छापिने उहाँको भनाई छ।

काठमाडौंको मतपत्र सबभन्दा धेरै ५६ लहरको हुने भएको छ भने सबभन्दा कम १६ लहरको मतपत्र डोल्पाको हुने आयोगले जनाएको छ ।

निर्वाचन आयोगका अनुसार २३ लहर समूहका ७७ प्रकारका १ करोड ९४ लाख मतपत्र छाप्ने निर्णय भएको छ ।