चितवन । गण्डकी प्रदेशका मुख्यमन्त्री कृष्णचन्द्र नेपाली पोखरेलले पृथ्वीसुब्बा गुरुङ नेतृत्वको सरकारले काम नगर्दा त्रिवेणी दुम्कीवास सडक निर्माणमा ढिलाई भएको बताउनुभएको छ । आज भरतपुरमा पत्रकारहरुसँग कुराकानी गर्दै मुख्यमन्त्री पोखरेलले प्रतिपक्षमा आवाज उठाउँदा काम भइरहेको छ भनेर अघिल्लो सरकारले झुट बोलेको र गठवन्धन सरकार बन्नासाथ फाइल अगाडि बढाएको बताउनुभयो ।
यसअघिको सरकारले चार वर्षसम्म पनि कुनै पहल नगर्दा त्रिवेणीका जनता अर्को प्रदेश भएर आफ्नो जिल्ला आउन वाध्यत भएको पोखरेलको भनाई थियो । “ सरकार सम्हालेर प्रगति हेर्दा अघिल्लो सरकारबाट कुनै पहल नै नभएको पाएँ, गठवन्धन सरकार बनेपछि अहिले डेडगाउँ झ्यालवास सडक ठेक्कामा गइसकेको छ । रोकिएको स्थानमा पनि चाँडै काम सुरु हुनेगरी पहल भइरहेको छ ।”
उहाँले प्रदेशकै लाइफलाइन मानिएको कोरला त्रिवेणी सडकखण्डको रोकिएका ठाउँमा समेत काम सुरु गर्ने पहल भइरहेको दाबी गर्नुभयो । निकुञ्जका कारण रोकिएको स्थानमा काम गर्न केन्द्रका मन्त्रालयसँग सहमति भइसकेको बताउनुभएको हो ।
साथै उहाँले प्रदेशसरकारसँग पर्याप्त साधन र स्रोत नभएको भन्दै नारायणी तटवन्ध प्रभावकारी हुन नसकेको बताउनुभयो । नारायणीले गर्ने कटान चितवन नवलपुरका लागि मुख्य समस्या भएको तर तटवन्धका लागि पर्याप्त साधन स्रोत अभाव रहेको बताउनुभयो ।
उहाँले भन्नुभयो,“प्रदेशको पहिलो प्राथमिकतामा छ तर साधन स्रोत नहुँदा केन्द्रकै भरमा छौँ । काम त भइरहेको छ तर जति हुनुपर्ने हो त्यो हुन सकेको छैन।”
नवलपुरका लागि अझ ठूलो समस्या रहेको तर ठूलो परियोजना समेत भएकाले तटवन्धका लागि केन्द्र सरकारकै भरमा बस्नुपरेको उहाँको भनाई थियो ।
अहिले डिपिआर नै बनाएर नारायणी तटबन्धका लागि केन्द्र सरकारले बजेट समेत दिएको बताउँदै प्रदेशबाट सक्ने बजेट निरन्तर पठाएर नारायणीबाट हुने क्षती रोक्न काम भइरहेको पोखरेलले बताउनुभयो ।
