चितवन । नेकपा माओवादी केन्द्रका अध्यक्ष पुष्पकमल दाहाल प्रचण्डले भरतपुर महानगरपालिकाको मेयरमा आफ्नो पार्टीको दावी रहेको बताउनुभएको छ ।
चुनावमा गठवन्धन हुने पक्का भएको भन्दै भरतपुरको मेयरमा आफ्नो पार्टीको दावी कायम रहेको उहाँको भनाई थियो । आज भरतपुरमा पत्रकारहरुसँग कुराकानी गर्दै अध्यक्ष प्रचण्डले नेपाली काँग्रेसको कार्यसमिति बैठकले गठवन्धन गर्ने निर्णयसँगै अव कुन पालिकामा कसलाई समर्थन गर्ने भन्नेबारे बैठक बसेर टुंगो लगाउने बताउनुभयो । प्रचण्डले भन्नुभयो,“महानगर र उपमहानगर हामी माथिबाटै टुंग्याउने सल्लाह छ । भोलि गठवन्धनको बैठक बसेर सम्भवत निर्णय गर्छौँ । ”
महानगर र उपमहागरमा गठवन्धन बसेर छलफल गर्ने र सोही अुनसार टुंगो लगाउने प्रचण्डको भनाई थियो । गठवन्धनको भोलि बैठक बस्ने र यसवारे निर्णय हुने बताउँदै चुनावतर्फ सवै राजनीतिक दल लागिसकेकाले चुनाव नहुने भन्ने प्रश्ननै नरहेको प्रष्ट पार्नुभयो ।
निर्वाचन हुने सुनिश्चत भएको र नेकपा माओवादी केन्द्र पनि यसको तयारीमा जुटिसकेको बताउँदै अन्य पार्टीहरुपनि आआफ्नो तरिकाले चुनावका लागि जुटेको बताउनुभयो ।
नेकपा माओवादी केन्द्र पार्टीकै निर्णय अनुसार गठवन्धन हुन लागेको बताउँदै आफ्नो शक्तिलाई सुदृढ गर्ने र आवश्यकता अनुसार तालमेल गर्ने भएकाले सो निर्णय हुने प्रचण्डको भनाई छ ।
उर्जामन्त्री पम्फा भुषाल, विद्युत प्राधिकरणका कार्यकारी निर्देशक कुलमान घिसिङ सहित प्रचण्ड चितवन आउनुभएको हो । उहाँ आज राप्ती नगरपालिकामा हर्दी विद्युत सवस्टेशनको उद्घाटन गर्ने, भरतपुर महानगरमा नारायणी तटबन्ध र पश्चिमतर्फको रिङरोड खण्ड शिलान्यस गर्ने र भरतपुर २२ धनौजीमा कभर्डहल उद्घाटन गर्ने कार्यक्रम रहेको छ ।
