चितवन । राप्रपा नेपालका अध्यक्ष कमल थापाले राजतन्त्र की गणतन्त्र भन्ने विवाद करिव करिव सकिएको घोषणा गर्नुभएको छ । राप्रपाबाट छुट्टीएर राप्रपा नेपाल ब्यूँताउनुभएको उहाँले आज चितवन आएर सो घोषणा गर्नुभएको हो ।
चितवनको भरतपुरमा आयोजित पत्रकार सम्मेलनमा बोल्दै अध्यक्ष थापाले आफूहरुले पनि सुशासन र समृद्धिको मुख्य एजेण्डा लिएर पार्टी निर्माण गरेको जानकारी दिनुभयो । “अव राजतन्त्र की गणतन्त्र भन्ने बहस सकियो । राष्ट्रको ध्यान आर्थिक विकास र समृद्धितर्फ हुनुपर्छ । ”
नेपालमा राजनीतिक परिवर्तन भएपनि आर्थिक सुधार नहुँदा जनताको अवस्था उस्तै रहेको थापाले बताउनुभयो । आर्थिक समृद्धिविना कुनैपनि राजनीतिक परिवर्तन दीर्घकालिन नहुने रहेछ भन्ने कुरा घाम झैँ झर्लङ्ग भएकाले आफूहरुले पनि राजतन्त्र की गणतन्त्र भन्ने विवादमा नलागेको प्रष्ट पार्नुभयो । अव कुनैपनि राजनीतिक मुद्दामा अल्झिनु अर्थहीन रहेको भन्दै राप्रपा नेपाल लोकतन्त्र, सनातन हिन्दु राष्ट्र,सुशासन र समृद्धिको एजेण्डा लिएर जनतामाझ पुगेको बताउनुभयो ।
राप्रपाबाट फुटेर आफ्नो पार्टी जन्मिएको नभई अलग पहिचान, फरक विचार, वैकल्पिक मार्ग चित्र लिएर खडा भएको पार्टी भएको दावी गर्नुभयो । राप्रपामा चरम सैद्धान्तिक विचलन र गलत प्रवृद्धि हावी भएको र त्यसलाई सच्याउन हरप्रहर लाग्दा समेत नभएपछि राप्रपा नेपाल जन्मिएको थापाको भनाइ थियो ।
स्थानीय चुनावमा त्यति चासो नभएको भन्दै पार्टीको खुट्टा टेकाउन सम्म सम्भव हुन्छ की भन्ने आशा रहेको थापाले बताउनुभयो । विभिन्न राजनीतिक दलसँग गठवन्धन गर्नेकुरामा भने छलफल भइरहेको बताउँदै सुरुमा नेकपा एमालेसँग पहिलो चरणको छलफल भएको थापाको भनाई थियो । उद्यपी पूर्ण निश्कर्षमा नपुगेको भन्दै एमाले प्रवेश गर्ने कुरा हल्लामात्रै भएको प्रष्ट पार्नुभयो ।
