डोलराज रानाभाट, गैँडाकोट । स्थानीय तहको निर्वाचन २०७९ का लागि नवलपुर जिल्लाको मुख्य निर्वाचन अधिकृतमा जिल्ला न्यायाधीश अर्जुन अधिकारीलाई तोकिएको छ ।
जिल्लामा रहेका आठ स्थानीय तहमध्ये कावासोती नगरपालिकामा रहने गरी उहाँलाई जिम्मेवारी दिएको आयोगले जारी गरेको सूचनामा उल्लेख छ ।
चुनाव आउन ४७ दिन बाँकी हुँदा आयोगले देशभरका लागि मुख्य निर्वाचन अधिकृत र निर्वाचन अधिकृतहरु तोकेको हो ।
जिल्लाको गैँडाकोट नगरपालिकाका लागि सर्वोच्च अदालतका इजलास अधिकृत दिपशिखा मुनाकमीलाई निर्वाचन अधिकृत तोकिएको छ ।
देवचुली नगरपालिकाका लागि जिल्ला सरकारी वकील कार्यालयका जिल्ला न्यायाधिवक्ता कमलराज पन्थी, मध्यविन्दु नगरपालिकाका लागि नवलपुर जिल्ला अदालतका स्रेस्तेदार महेन्द्र प्रसाद पौडेल, बुलिङटार गाउँपालिकाका लागि जिल्ला समन्वय समितिका जिल्ला समन्वय अधिकारी देवीप्रसाद आचार्य, बौदीकाली गाउँपालिकाका लागि मालपोत कार्यालय कावासोतीका प्रमुख मालपोत अधिकृत प्रेम बहादुर दौल्याल, विनयी त्रिवेणी गाउँपालिकाका लागि लोकसेवा आयोगका कानूनतर्फका उपसचिव लोकहरि कडेँल र हुप्सेकोट गाउँपालिकाका लागि सर्वोच्च अदालतका उपरजिष्ट्रार यज्ञमुर्ति ज्ञवालीलाई निर्वाचन अधिकृत तोकिएको छ ।
स्थानीय तह निर्वाचन ऐन, २०७३ को दफा ७ बमोजिम जिल्ला न्यायाधीश तथा नेपाल सरकारका राजपत्राङ्कित द्वितीय श्रेणीका अधिकृत स्तरका कर्मचारीलाई मुख्य निर्वाचन अधिकृत र निर्वाचन अधिकृतको पदमा नियुक्त गरिएको हो। चैत २९ देखि लागू हुने गरी उहाँहरु नियुक्त हुनुभएको हो ।
उहाँहरुलाई निर्वाचन व्यवस्थापन सम्बन्धी अभिमुखीकरण कार्यक्रम गरिने भएको छ ।
वैशाख २ गते हेटौँडामा हुने उक्त अभिमुखीकरणमा अनिवार्य सहभागी हुनु समेत अनुरोध गरिएको छ । मुख्य निर्वाचन अधिकृत र निर्वाचन अधिकृतको नियुक्ति पत्र अभिमुखीकरण कार्यक्रममै उपलब्ध गराइने निर्वाचन आयोगले जनाएको छ ।
