गैँडाकोट । पछिल्लो समय जटिल वन्दै गइरहेको साइबर अपराध र यसबाट हुने सम्भावित क्षतीबाट बच्न गैँडाकोटमा सचेतना कार्यक्रम सम्पन्न भएको छ । कार्यक्रमको प्रमुख अतिथि वडाअध्यक्ष ध्रुवराम पौडेलले उद्घाटन गर्नुभएको हो ।
कार्यक्रममा बोल्दै वडाअध्यक्ष पौडेलले विकसीत प्रविधिको बढ्दो प्रयोगसँगै यसबाट विकृती समेत भइरहेकाले त्यसबाट बच्न यो कार्यक्रम निकै महत्वपूर्ण रहेको बताउनुभयो । ससाना बालवालिका देखि प्रोढसम्मनै साइवर अपराध र त्यसबाट हुने ठगी बाट आक्रान्त भइरहदा यसरी दिइने सचेतना प्रभावकारी हुने र अन्य ठाउँमा पनि संचालन गर्नुपर्नेमा जोड दिनुभयो ।
एम्स् एब्रड स्टडी एजुकेशन र एकेडेमी अफ प्रोफेशनल एजुकेशन चितवनको सहयोगमा फोब्र्स साइबर एण्ड सेक्युरीटी अवारनेश क्लवले विद्यार्थी र अभिभावकहरुलाई सो सचेतना प्रदान गरेको हो ।
कार्यक्रममा बोल्दै एम्स् एब्रड स्टडी एजुकेशनका संचालक कृष्ण कडेँलले विज्ञान प्रविधिको विकाससँगै चुनौति पनि थपिएको बताउनुभयो । आफ्नो संस्था व्यवसायिक भएपनि सामाजिक कार्यमा त्यतिनै सक्रिय रहेको उहाँको भनाई थियो । साइबर अपराध, बढ्दो इन्टरनेट प्रविधिबाट भएका विकृति र यसबाट बच्ने उपाय थाहा पाउन जरुरी भएकाले आफ्नो संस्थाले सहकार्य गरेर कार्यक्रम गरेको बताउनुभयो । बालवालिका देखि ठूलो उमेर समुहका मानिसहरु समेत यसबाट समस्यामा रहेका कारण कसरी प्रविधि, सामाजिक संञ्जालको सही प्रयोग गर्ने आदिवारे कार्यक्रममा जानकारी गराइएको थियो ।
फोब्र्स साइबर एण्ड सेक्युरीटी अवारनेश क्लवका अध्यक्ष उत्सव ढकालले हरेक ठाउँका विद्यार्थी, बालवालिका, स्थानीय महिला संजालसम्म पुगेर साइबर सेक्युरीटी र यसबाट बच्ने उपायवारे जानकारी दिँदै गएको बताउनुभयो । सानो गल्तीले पनि जीवन क्षती हुनसक्ने र त्यस्ता हानीबाट बच्न आफूहरुले विभिन्न संघसंस्थाको सहयोगमा कार्यक्रम गर्दै आइरहेको जानकारी दिनुभयो ।
आफ्नो बालवालिकाले कसरी सामाजिक संञ्जालको प्रयोग गरेको छ त्यसवारे रेखदेख गर्न अभिभावकलाइ प्रशिक्षकहरुको आग्रह थियो । त्यस्तै नभरेको लोटरी पर्दैनपर्ने भन्दै विभिन्न चिठ्ठा पर्यो भन्दै फोन आउने र पैसा हाल्न लगाउनेहरुसँग सचेत हुन आग्रह थियो । साथै साइबर बुलिङ, आफ्नो आइडी पासवर्ड कसरी राख्ने र सुरक्षित बनाउने लगायतका विषयमा पनि जानकारी दिइएको थियो । साथै साइबर अपराधबाट न्याय पाउन प्रहरीकोमा जानुपर्ने र प्रमाण सहित उजुरी गर्न समेत सुझाव दिइएको थियो ।
कार्यक्रममा विद्यालयका प्राचार्य हिरालाल अर्याल, विद्यार्थी, महिला दिदीवहिनीहरुको सहभागीता रहेको थियो ।
