चितवन । शैक्षिक हब बनाउने पहलमा रहेको रत्ननगर नगरपालिकामा पोखरा विश्वविद्यालयको आङ्गीक क्याम्पस संचालन हुने भएको छ । क्याम्पस संचालनका लागि आज नगरपालिकामा नगरप्रमुख नारायण वन र विश्वविद्यालयका उपकुलपति प्राध्यापक डाक्टर प्रेम नारायण शर्माले सम्झौतापत्रमा हस्ताक्षर गरेर क्याम्पस संचालन गर्ने चरण सुरु भएको हो ।
पर्यटकीय क्षेत्रबाट मात्रै होइन रत्ननगरका जनप्रतिनिधिहरु शिक्षाको हबले पनि आफ्नो ठाउँ चिनाउन कस्सीएर लागेका हुन् । यस अघि प्राविधिक विषय पढ्न भरतपुर र काठमाण्डौ जानुपर्दथ्यो । अहिले विभिन्न चार वटा विद्यालयमा प्राविधिक शिक्षा पढाई हुन्छ । जनप्रतिनिधि आएपछि मात्रै प्राविधिक शिक्षा सुरु भएको रत्ननगर नगरपालिकाका नगरप्रमुख नारायण वनले बताउनुभयो । अहिले स्नातक तहसम्म इन्जिनियरीङ पढाइ हुनेगरी पोखरा विश्वविद्यालयसँग वडानम्वर १२ मा आङ्गीक क्याम्पसनै संचालन गर्न आज सम्झौता भएको छ । यसले दक्ष जनशक्ति उत्पादनमा टेवा पुग्ने नगरप्रमुख वनको भनाई छ । साथै आगामी शैक्षिकसत्र देखिनै भर्ना सुरु गर्न भनेको र विद्यालयकै केही भवन रहेकाले सहज हुने बताउनुभयो । क्याम्पस संचालनका लागि नगरपालिकाले पूर्ण सहयोग गर्ने उहाँको भनाई छ ।
उपप्रमुख विमला दुवाडीले घरकै आँटोपिठो खाएर इन्जिनियरीङ अध्ययन गर्ने वातावरण वन्न लागेको भन्दै सहयोग गर्ने सवैमा आभार व्यक्त गर्नुभयो । सात वटै प्रदेशमा आङ्गीक क्याम्पस स्थापना गर्ने पोखरा विश्वविद्यालयको योजना अनुसार यो पहिलो सुरुवात हो । २५औँ वर्ष पुगेको अवसरमा यसरी क्याम्पस स्थापन गर्न तयार भएको र शैक्षिक विकासमा ठूलो टेवा पुग्ने विश्वविद्यालयका उपकुलपति शर्माले बताउनुभयो । चाँडै प्राविधिक टोली आएर निरीक्षण गरेपछि थप कार्य अगाडि बढ्ने बताउनुभयो । एक बर्षमा ८० अर्ब रुपैया शिक्षाको लागि विदेशिने भन्दै यसलाई रोक्न पनि पोखरा बाहिर आङ्गिक कलेज सञ्चालन गर्न लागिएको बताउनुभयो ।
नगरशिक्षा अधिकारी बद्री नारायण शर्माले विद्यार्थी नभएर मर्ज भई वन्द हुन गएको ठाउँमै जग्गा दिएर क्याम्पस स्थापन गर्न सहमति भएको हो । उहाँले भननुभयो,“विद्यार्थी भएनन् । मर्जपछि संरचना र जमिन खाली थियो । त्यही ठाउँ उपलब्ध गराएर प्रकृया अगाडि बढेको हो । ”
आउँदो शैक्षिकसत्रदेखिनै पढाई सुरु गर्ने लक्ष्य राखिएको रजिष्ट्रार डा दिपक भण्डारीले बताउनुभयो । आङ्गीक क्याम्पस भएपछि निजीमा भन्दा सस्तो शुल्कमा अध्ययन गर्न सकिने बताउनुभयो ।
पूर्वाधार निर्माणको लागि एक करोड रुपैया उपलब्ध गराउने नगरप्रमुख वनको भनाई छ । कार्यक्रममा रत्ननगर नगरपालिकाकी उपमेयर विमला दुवाडी,प्रमुख प्रशासकीय अधिकृत शिशिर पौडेल,कार्यदलका संयोजक रामबाबु घिमिरे,शिक्षा समितिका सदस्य तथा कार्यदलका सदस्य विष्णु पौडेल,नगर शिक्षा अधिकारी बद्रिनारायण शर्मा, लगायतले मन्तव्य राख्नुभएको थियो । कार्यक्रममा नगर स्तरीय राजनीतिक दलका पदाधिकारी,वडाध्यक्ष,कार्यपालिका सदस्य,शिक्षा समितिका सदस्यहरु,विद्यालयका शिक्षक,व्यवसायीहरुको सहभागिता रहेको थियो ।
