चितवन । चितवन भरतपुर १ रामनगरका निर्मल पूर्जालाई आज भव्य स्वागत सहित अभिनन्दन गरिएको छ । विश्वका ८ हजार मिटर भन्दा अग्ला १४ वटा हिमालहरुको आरोहण गर्नुभएका उहाँलाई भरतपुर विमानस्थलमा स्वागत गरी लायन्सचोकबाट अभिनन्दन यात्रा सुरु गरिएको हो ।
भरतपुर १ रामनगरमा घर भएका पूर्जा अर्थात निम्स दाई ले हिमाल आरोहण मार्फत आफ्नो ठाउँ र देशलाई विश्वमा चिनाउन सफल भएकाले भव्य स्वागत सहित सम्मान गरिएको निर्मल पूर्जा स्वागत, अभिनन्दन तथा सम्मान कार्यक्रम आयोजक समितिका अध्यक्ष हरिकुमार गुरुङले बताउनुभयो ।
दिउसो साँढे १ बजे भरतपुर विमानस्थलमा स्वागत पछि त्यहाँबाट दिउँसो २ बजेदेखि लायन्सचोकबाट पुल्चोक हुँदै पोखरा बसपार्कबाट रामनगर हुँदै पूर्जाको निवासमा लगिएको थियो । त्यहाँबाट नारायणी नदी तिरमा अभिनन्दन गरिएको टंक न्यौपानेले बताउनुभयो ।
समितिका अध्यक्ष हरि कुमार गुरुङका अनुसार पूर्जाले १४ वटा हिमाल ६ महिना ६ दिनमै आरोहण गरेर सवै कुरा सम्भव छ भन्ने नारालाइ पूर्णता दिनुभएको छ।
सन् १९८३ मा म्याग्दी जिल्ला अन्नपूर्ण गाउँपालिका ३ दानामा जन्मिनुभएका पूर्जा आफू पाँच वर्षको उमेर हुँदानै परिवार सहित रामनगरमा बसाई आएको स्थानीयले बताए । निर्मल पूर्जा स्मल हेभनमा पढ्नुभएको थियो ।
साथै नारायणी किनारमा नेटफ्लीक्समा समेत टे«डिङमा परेको फोर्टीन पिक्सः नोथिङ इम्पोसिवल नामक डकुमेन्ट्री समेत प्रदर्शन गरिएको थियो । उक्त कार्यक्रममा बोल्दै प्रमुख अतिथि भरतपुर महानगर प्रमुख रेनु दाहालले पूर्जाले आफ्नो साहसिक कार्यबाट भरतपुरलाई चिनाउन सफल भएको भन्दै गौरवान्वित भएको बताउनुभयो ।
मौसम प्रतिकुलताका बाबजुत पनि कार्यक्रम सफल भएको आयोजकले जनाएको छ । रामनगर निवासमा पूर्जालाई व्याण्ड बाजा सहित अभिनन्दन गरिएको थियो ।
