गैँडाकोट । आगामी स्थानीय तहको निर्वाचन आउन जम्मा ५१ दिनमात्रै बाँकी छ । अहिले म्यादी प्रहरीको भर्नाप्रकृया सुरु भइसकेको छ । दलहरु उम्मेदवार छनौटको मापदण्ड बनाएर सर्कुलर गरिरहेका छन् । आफ्नो पार्टीका उम्मेदवार जिताउन विभिन्न अभियान चलाइरहेका छन् ।

गैँडाकोटमा पनि नेकपा एमालेबाट मेयर कसलाई बनाउने भन्ने बहस सुरु भइसकेको छ । बहसकैबीच नेकपा एमालेबाट निर्वाचित वर्तमान वडाअध्यक्षहरुले भने हालका मेयर छत्रराज पौडेललाई नै दोहोर्याउनुपर्नेमा जोड दिनुभएको छ । ‘योजनामा प्रतिवद्ध र मुद्दामा कटिवद्ध’ पौडेललाई दोहोर्याउन सके समृद्ध गैँडाकोट हासिल हुने र अपूरा कार्य पूरा गर्नुका साथै नेकपा एमालेको घोषणापत्र धेरैहदसम्म कार्यान्वयनमा आउने उहाँहरुको भनाई छ । काँग्रेसको गढ मानिने गैँडाकोटमा नेकपा एमालेका उम्मेदवार छत्रराज पौडेलले २०७४ सालको चुनावमा ११ हजार ३०२ मत सहित विजयी हासिल गर्नुभएको थियो । अवको चुनावमा पनि उहाँलाई नगरप्रमुखमा दोहोर्याउनुपर्ने मत बढ्दै गएको हो ।

आफ्नो कार्यकालमा विभिन्न मुद्दा मामला समेत झेल्नुपरेपनि जनताको सेवामा निरन्तर लाग्नुभएको र ती मुद्दा मामलामा समेत मेयर छत्रराज पौडेलकै जित भएर आफूलाई पारदर्शी नेता प्रमाणित गरिसकेकाले ‘मुद्दामा कटिवद्ध र योजनामा प्रतिवद्ध’ पौडेललाई पुन : एक कार्यकाल दोहोर्याउनुपर्ने मत रहेको हो । उहाँलाई दोहोर्याउन सकेमात्रै गैँडाकोटको विकासमा ठूलो परिवर्तन आउने र नेकपा एमालेले जनतासँग गरेको बाचा पूरा गर्न सम्भव हुनुका साथै अधुरा विकासका कार्य सम्पन्न गरी नयाँ योजना लागू गर्न सहज हुने भनाई छ ।

घटनाचक्रसँग कुरा गर्दै सवै वडाअध्यक्षहरुले पार्टीले कसलाई टिकट दिन्छ त्यो पार्टीकै निर्णय हुने र सवैलाई मान्य समेत हुने बताउँदै आफ्नो व्यक्तिगत विचार रहेको भन्दै यो मत व्यक्त गर्नुभएको हो ।

गैँडाकोट ५ का वडाअध्यक्ष नवराज कडेँलले आकाक्षिहरु धेरै हुनु स्वभाविक भएपनि पुनः एक कार्यकाल हालका मेयर छत्रराज पौडेललाई दोहोर्याउनुपर्नेमा सवै वडाअध्यक्षहरु एकमत रहेको बताउनुभयो । वडाअध्यक्ष कडेँलले भन्नुभयो,“नेकपा एमालेलेमात्रै होइन, अन्य पार्टीले पनि उहाँलाई समर्थन गर्नुपर्छ भन्ने लाग्छ । उहाँकै सक्रियतामा गैँडाकोटमा धेरै विकास निर्माणका काम भएका छन् । मेयरमा निर्वाचित हुनासाथ यो पार्टी त्यो पार्टी नभनि विकासमा लागिरहनु भएको छ । जनतासँग पनि परिचित हुनुहुन्छ । ”

वडाअध्यक्ष कडेँलले मेयर पौडेलको व्यक्तिगत पहुँच केन्द्रीय नेताहरुसँग नभएकोभए अहिले भएकाजति विकास गर्न कठिन हुने बताउनुहुन्छ । सीमित स्रोतका बाबजुत कार्यपालिका र नगरसभामा पटक पटकको असहयोग हुँदापनि जनताको माग सम्वोधन गर्न सक्नुभएका पौडेललाई पुन एक पटक दोहोरिन दिएर समृद्ध गैँडाकोटका लागि बाँकी र नयाँ योजना पूरा गर्न दिएर नगरलाई समृद्ध पार्नुपर्नेमा जोड दिनुभयो ।

गैँडाकोट १० का वडाअध्यक्ष देवीदत्त कडेँलले पनि अवको मेयरमा छत्रराज पौडेलललाई दोहोर्याउनुपर्ने बताउनुभयो । पाँच वर्षको अनुभवलाई पुन : एक कार्यकाल दोहोर्याउँदा जनताको चाहाना परिणाममुखि हुने उहाँको भनाई छ । उहाँले भन्नुभयो,“हालसम्मपनि राम्रै काम गर्नुभएको छ । पुनः नयाँ व्यक्ति आउँदा जनतासँग नजिक भएर समस्या बुझ्नै समय लाग्छ । तर उहाँलाई त अव सवै अनुभव छ । निर्वाचित हुनासाथ जनताको काममा सिधै लाग्नुहुन्छ । त्यसैले मेयरमा नयाँ व्यक्तिभन्दा उहाँलाई दोहोर्याउनुपर्छ ।” यो पाँच बर्षमा जनताका कुन कुन काम कसरी गर्नुपर्छ भन्ने जानकारी भएको र नयाँ व्यक्ति आउँदा पुनः त्यतिनै समय जनताको समस्या बुझ्नैमा जाने भएकाले अपेक्षित नजिता आउन कठिन हुने उहाँको भनाई छ ।

गैँडाकोट ११ का वडाअध्यक्ष गोविन्द सुवेदीले मेयर छत्रराज पौडेलले आफूलाई ‘मुद्दामा कटिवद्धता र योजनामा प्रतिवद्धता’को छवि बनाइसक्नुभएको बताउनुभयो । उहाँले भन्नुभयो,“ यदि साँच्चै गैँडाकोटनगरको समृद्धि चाहाने हो भने उहाँनै दोहोरिन पर्छ । उहाँ मुद्दामा कटिवद्ध र योजनामा प्रतिवद्ध नेता हो । ”

गैँडाकोट १३ का वडाअध्यक्ष पदमलाल पौडेललेको पनि मत त्यही छ । मेयरमा छत्रराज पौडेल दोहोरिनुपर्छ भन्दै पार्टीमा निर्भर रहने बताउनुभयो । तर पार्टीले पनि उम्मेदवार छनौट गर्दैगर्दा जनतासँग परिचित र अभिमत धेरै प्राप्त हुने व्यक्तिनै छनौट गर्नुपर्ने उहाँको भनाई छ । उहाँले भन्नुभयो,“मुख्यतय : कसलाई उम्मेदवार गराउने पार्टीको ‘डिसिजन’ हो । तर पार्टीले ‘डिसिजन’ पनि केको आधारमा टेकेर गर्ने भन्ने सवालमा मुख्य कुरा त जनताको अभिमत र जननिर्वाचित प्रतिनिधि भइसकेको अवस्था, कोभिडको कारण एमालेको घोषणापत्रमा रहेका विकास समृद्धिका योजना लक्ष्य अनुसार गर्न नपाएको परिस्थितीमा उहाँ दोहोरिदा धेरै राम्रो हुन्छ । ”

पौडेलका अनुसार संघीय लोकतान्त्रिक गणतन्त्र प्राप्ती पछिको पहिलो नगरप्रमुख भएकाले संघीयताले दिएका अधिकार,निर्माणगर्नुपर्ने कानुन लगायतमा ज्ञान भइसकेकाले पुनः जिम्मेवारी दिएर यी सवै कार्य पूरा गर्न सहज हुने बताउनुभयो । साथै मेयर छत्रराज पौडेलका हालसम्म पनि कुनै नराम्रा आर्थिक आचारणहरु नभएको, जनताको काम सजिलै छिट्टै गरिदिने, सहजै भेटेर जनचाहाना पूरा गर्न प्रतिवद्ध भएकाले नगरको विकास र समृद्धिका लागि उहाँलाई दोहोर्याउदा यहाँका जनतालाई पनि फाइदा रहेको उहाँको भनाई छ ।

गैँडाकोट ९ का वडाअध्यक्ष प्रेमप्रसाद सापकोटाले यो विल्कुल पार्टीको अधिकार भएको बताउँदै पार्टीले निर्णय गर्ने व्यक्तिलाई सवैले मान्ने बताउनुभयो । चाहान राख्नु स्वभाविक र धेरै व्यक्तिहरु भएपनि पार्टीले उम्मेदवार छनौट गर्दा जनमत को सँग छ, काम गर्न सक्ने क्षमतावान सवै हेरेर गर्नुपर्ने बताउनुभयो । उहाँले भन्नुभयो,“ एक त चुनाव नै सहज छैन । त्यस्तै निर्वाचित पछिपनि जनचाहाना र संघीयताले दिएको अधिकार प्रयोग गर्न बनाउनुपर्ने कानुन देखि बजेट ल्याउन सवै चुनौति रहेको छ । अहिले व्यक्ति तोक्नभन्दा पार्टीको निर्णय पर्खौँ । तर जनमतको हिसावमा छत्रराज पौडेल पनि राम्रो व्यक्ति हो ।”

गैँडाकोट ८ का वडाअध्यक्ष डिलाराम रिजालले पनि मेयरमा पौडेल उपयुक्त व्यक्ति भएको बताउनुभयो । उहाँले भन्नुभयो,“ मेयरमा इच्छा राख्नु स्वभाविक हो । पार्टीले टिकट दिएको खण्डमा मेयरमा उहाँलाई फाल्नुपर्ने कुनै कारण छैन । राख्नुपर्ने व्यक्ति हो । ”

मेयर छत्रराज पौडेलले यसअघिनै आफू पुनः एक कार्यकाल दोहोरिने आकाक्षा व्यक्त गरिसक्नुभएको छ ।