गैँडाकोट । नवलपुरको गैँडाकोट नगरपालिका वडानम्वर ५ ले रोजगारीका अवसर बढाउँदै लगेको छ । देशमै जटिल वनेको बेरोजगारीको संख्या कम गर्न वडाअध्यक्ष नवराज कडेँलको नेतृत्वले आफ्नो वडावासीलाई तालिमपछि सहजै रोजगारी पाइने सिप प्रदान गर्न सुरु गरेको हो । तालिमपछि सहजै रोजगारी पाउने व्यवसायिक ड्राइभिङ तालिम वडाका १६ जनालाई आजदेखि दिन थालिएको छ ।
चुनावमा जनताले जिताएलगत्तै वडाभित्रका युवाहरुको सिप विकास गरी स्वरोजगार गराउने प्रतिवद्धता अनुसार कार्यक्रम गरिएको वडाअध्यक्ष नवराज कडेँलले जानकारी दिनुभयो । प्रमुख अतिथि वडाअध्यक्ष कडेँलले कार चलाएर तालिम सुरु भएको घोषणा गर्नुभयो ।
युवालक्षित यसअघिका कार्यक्रममा खासै सहभागी नभएपनि ड्राइभिङ तालिममा उल्लेख्य आवेदन परेको र मापदण्डमा परेर छनौट भएका १६ जनालाई पहिलो चरणमा तालिम दिएको बताउनुभयो । उहाँले भन्नुभयो,“यो पहिलो चरण हो । हाम्रो कार्यकाल सकिएपनि नयाँ आउने नेतृत्वले यो तालिमलाई निरन्तरता दिन भन्छौँ । वडाका सवै युवामा सिप विकास गर्ने हाम्रो लक्ष्य हो । ”
ड्राइभिङ सिप रोजगारीका लागि मात्रै नभई मानिसको दैनिक आवश्यकता जस्तै वनेको र सवैखालका रोजगारीमा यसको ठूलो महत्व रहेकाले तालिम दिन थालिएको वडाअध्यक्ष कडेँलले बताउनुभयो । हातमा सिप भएपछि बेरोजगार हुन नपर्ने भएकाले तालिम राम्रोसँग लिएर १६ जनालेनै सवारी चालक अनुमति पत्र प्राप्तीको शुभकामना दिनुभयो ।
विशिष्ट अतिथि कार्यपालिका सदस्य कुमारी रेखा पौडेलले युवालक्षित अन्य धेरै कार्यक्रम गरेको बताउँदै ड्राइभिङ सिपले रोजगारी तथा स्वरोजगरका लागि सहयोग पुग्ने बताउनुभयो । तालिममा सहभागीले बीचमा नछाड्न आग्रह गर्दै राम्रोसँग सिकाउन प्रशिक्षकलाई अनुरोध गर्नुभयो। वडाले यसअघि पनि लागूपदार्थ दूव्र्यसनीविरुद्ध सचेतना कार्यक्रम ,कुक तालिम लगायत सम्पन्न गरिसकेको जानकारी दिनुभयो ।
वडासदस्य हरिप्रसाद ढकाल र पार्वती सापकोटाले जीवनका लागि अपरिहार्य सिप ड्राइभिङ भएको र राम्रोसँग सिकेर व्यवसायिक जीवन सुरु गर्न शुभकामना दिनुभयो ।
ड्राइभिङ तालिम दिन छनौट भएकी सुस्मिता ड्राइभिङ स्कुल गैँडाकोट ५ की संचालिका सुस्मिता थापा मगरले २६ दिनसम्म तालिम हुने र राम्रोसँग सिकाइने बताउनुभयो । हालसम्म ३ सय बढी प्रशिक्षार्थीलाई तािलम दिइसकेको संस्था भएको बताउनुभयो ।साथै अनुमतिपत्र प्राप्तीका लागि सहजीकरण गर्ने समेत बताउनुभयो ।
तालिममा मापदण्ड तोकेर आएका आवदेनलाई छनौट गरिएको थियो । तालिममा छनौट हुनुभएका धनराज कडेँलले वडाले महत्वपूर्ण सिप दिने तालिम ल्याएको र आगामी दिनमापनि यस्तै आवश्यकताको कार्यक्रम ल्याएर अझ धेरै युवाहरुलाई समावेश गर्न सुझाव दिनुभयो ।
कार्यक्रम सरोज कडेँलले सहजीकरण गर्नुभएको थियो ।
