विराटनगर । शिक्षकले विद्यार्थीलाई यौन दुर्व्यवहार गरेको घटनालाई लिएर मोरङको लेटाङमा भएको झडपमा एक प्रहरीको ज्यान गएपछि आज विहानैदेखि कफ्र्यू जारी भएको छ ।
स्थानीय प्रशासनले थप घटना हुन नदिन कफ्र्यू जारी गरेको जिल्ला प्रशासन कार्यालय मोरङले जनाएको छ। लेटाङ नगरपालिका ५ खेरूवा क्षेत्रमा आज बिहान ७ बजेदेखि अर्को आदेश नहुञ्जेलसम्म कर्फ्यू जारी गरिएको हो ।
कक्षा ६ मा अध्ययनरत एक छात्रालाई शिक्षकले यौन दुर्व्यवहार गरेपछि उनलाई प्रकाउ गर्न छाडेर उल्टै सुरक्षा दिएको भन्दै आक्रोशित स्थानीय प्रहरीमाथि जाइलागेका थिए । लेटाङ नगरपालिका ५ स्थित शिक्षा विकास माध्यमिक विद्यालयका शिक्षक ५६ वर्षीय मनोज पौडेलले कक्षा ७ मा अध्ययनरत छात्रामाथि यौन दुर्व्यवहार गरेको स्थानीयको आरोप छ ।
झडपका क्रममा प्रहरी जवान उर्मिला श्रेष्ठको घाँटीमा छुरा प्रहार भएपछि कोसी प्रादेशिक अस्पतालमा उपचारकाक्रममा उनको मृत्यु भएको थियो ।
