गैंडाकोट । गैंडाकोट चौथो उप–मेयर कप अन्तरमावि छात्रा फुटबल प्रतियोगिताको उपाधि रत्न राज्य लक्ष्मी माविले चुमेको छ । आज सम्पन्न फाईनल खेलमा विजय सामुदायिक शिक्षा सदनलाई १–० गोलले हराउदै ४२ हजार नगद, मेडल, शिल्ड,प्रमाणपत्र हात पारेको छ । कार्यक्रमकी विशिष्ट अतिथि नगरउपप्रमुख विष्णु कुमारी कडेँल सापकोटाले पुरस्कार प्रदान गरेकी थिइन् ।
पहिलो हाफमा कुनै गोल नभएपनि दोस्रो हाफमा पेनाल्टी पाएर गोल गरेपछि रत्नराज्य लक्ष्मी माविले उपाधि जितेको हो ।
फागुन २४ देखि सुरु भएको प्रतियोगितामा १६ वटा माविले सहभागिता जनाएका थिए ।
प्रतियोगितामा उपविजेता विजय सामुदायिक शिक्षा सदनले ३२ हजार नगद, मेडल, ट्रफी, प्रमाणपत्र हात पारेको छ । त्यस्तै प्रतियोगितामा दुई वटा विद्यालय बालविकास मावि र नारायणी माविले तृतीय पुरस्कार रु. १७ हजारका दरले प्राप्त गरेका छन् ।
प्रतियोगितामा सर्वोत्कृष्ट खेलाडीको पुरस्कार रु. ६ हजार नगद सहित विजय सामुदायिक शिक्षा सदनकी सारा सापकोटाले पाइन् भने उत्कृष्ट गोल रक्षकको रु.५ हजार पुरस्कार रत्नराज्य लक्ष्मीकी पार्वती थापाले प्राप्त गरिन् । प्रतियोगिता अवधिभर धेरै गोल गर्नेमा विजय सामुदायिक शिक्षा सदनकी आयुष्मा परियार र रत्नराज्य लक्ष्मीकी मुना महतोले समान ५/५ गोल गरेपछि रु. ५ हजारको आधाआधा प्राप्त गरेका थिए ।
फाइनल खेलको म्यान अफ द म्याचको रु. १ हजार पुरस्कार भने रत्नराज्य लक्ष्मीकी ममता शाहीले प्राप्त गरिन् ।
कार्यक्रममा उत्कृष्ट मार्चपास गराएका भन्दै गैँडाकोट इग्लिस स्कुल रु. ६ हजार सहित पुरस्कृत भएको छ ।
बागमती प्रदेश सांसद रिना गुरुङले उपलब्ध गराएको रु. ५ हजार वालविकास बोडिङ स्कुलका छात्राहरुलाई प्रदान गरिएको छ । गुरुङ प्रमुख अतिथि रहेको दिन खेलभएको मध्य उत्कृष्ट प्रदर्शन गरेको भन्दै गुरुङले सो रकम उपलब्ध गराएको आयोजकले जनाएको छ ।
गैँडाकोट खेलकुद विकास समितिको आयोजना, महिला खेलकुद विकास समितिको सहआयोजना र गँैडाकोट नगरपालिकाको संरक्षकत्वमा सम्पन्न प्रतियोगिता समापनका दिन बोल्दै प्रमुख अतिथि नगरप्रमुख छत्रराज पौडेलले विवादैविवादले नगरको खेल क्षेत्र विकासका लागि खेलकुद समिति गठन नभएपनि खेल गतिविधि नरोकेको बताए । नगरबाट हुनसक्ने सहयोग गरेर क्रिक्रेट फुटवल लगायतका खेलाडी उत्पादनमा काम गरेको उनको भनाई थियो ।
विशिष्ट अतिथि उपप्रमुख विष्णु कुमारी कडेँल सापकोटाले छात्राहरु पनि खेल खेल्न सक्षम सँगै खेलबाट परिवार, गाउँ समाज र देशलाई चिनाउन सक्छन् भन्ने प्रमाणीत भएको बताइन् । आफ्नो अन्तिम कार्यकालसम्मपनि प्रतियोगिता संचालनमा सहयोग गरेको भन्दै खेलाडीलाई सहयोग गर्न कुनै कन्जुस्याइ नगरेको उनको भनाई थियो ।
कार्यक्रमका अध्यक्ष गैँडाकोट खेलकुद समितिका अध्यक्ष लक्ष्मण कार्कीले विद्यालय तहबाटै खेलाडी उत्पादन भएमात्रै राम्रो खेल खेल्न सकिने बताए । यो पटक उत्साहजनक सहभागीता र राम्रो प्रदर्शनका साथ विद्यार्थीहरुले आफूलाई सक्षम प्रमाणीत गरेको कार्कीको भनाई थियो । साथै आगामी दिनमा विद्यालय तहमै खेल प्रशिक्षक आवश्यक परे समितिले उपलब्ध गराउन तयार रहेको समेत उनको भनाई थियो ।
कार्यक्रममा विभिन्न सांस्कृति प्रस्तुती समेत रहेको थियो । समापन कार्यक्रममा वडाअध्यक्षहरु सहित जनप्रतिनिधि, समाजसेवी, युवा तथा खेलप्रेमी,विद्यालयका संचालक, प्रधानाध्यापक शिक्षक विद्यार्थी लगायतको सहभागीता रहेको थियो ।कार्यक्रम रोशन दर्लामीले सहजीकरण गरेका थिए ।नारी दिवसको अवसरमा फागुन २४ गतेदेखि सुरु भएको प्रतियोगिता आज सकिएको हो ।
