चितवन । उद्योग वाणिज्य संघ चितवनको निर्वाचन आज हुँदैछ । सर्वसम्मत अध्यक्षमा चयन भएका चुननारायण श्रेष्ठका अनुसार संघको पदाधिकारीमा निवर्तमान अध्यक्ष, अध्यक्ष, बरिष्ठ उपाध्यक्ष र तीन जना उपाध्यक्ष रहने व्यवस्था छ । तीन जना उपाध्यक्षमा वाणिज्यतर्फबाट, उद्योग र एसोसियट्स तथा वस्तुगतबाट एक एक जना निर्वाचित हुनेछन् ।
निर्वाचित यी तीन जना उपाध्यक्षलाई कार्यसमितिको पहिलो बैठकले प्रथम, द्धितीय र तृतीय तोकिदिने निर्णय गर्नेछ । यी पदमा उम्मेदवार दिनेहरुको वाणिज्यबाट आउनेको वाणिज्य सम्बन्धी फर्म हुनुपर्छ । त्यस्तै उद्योगवाट आउनेको उद्योग सम्बन्धी फर्म र एसोसियट तथा वस्तुगत तर्फ सम्वन्धीत व्यक्ति मतदाता लिष्टमा नाम र प्रतिनिधि हुनुपर्छ ।
एसोसियट्स भन्नाले १ करोड बढी पुँजी भएको प्रालि संस्थाहरुलाई जनाउँदछ भने वस्तुगत भनेको विषयतगत जस्तै कपडा व्यवसायी, सुन, साइकल, हार्डवयर आदि ।
यसरी ६ जना पदाधिकारी आउनेछन् भने कार्यसमिति सदस्यतर्फ ६ जना कार्यसमिति सदस्य उद्योगतर्फबाट, ६ जना वाणिज्यबाट, ४ जना बस्तुगतबाट, २ जना एसोसियट्सबाट, एक जना महिला,एक जना क्षेत्रीय सदस्य र तीन जना मनोनित गरिनेछ ।
प्रमुख निर्वाचन अधिकृत राजकुमार श्रेष्ठका अनुसार दोस्रो पटक प्रकाशन गरिएको उम्मेदवारको नामावली अनुसार अध्यक्षमा चुननारायण श्रेष्ठ, बरिष्ठ उपाध्यक्षमा सुमन कुमार श्रेष्ठ, उपाध्यक्ष उद्योगतर्फ चिरन्जीवी सुवेदी निर्विरोध चयन भइसकेका छन् ।
तर उपाध्यक्ष वाणिज्यमा एक जनाका लागि शंकर नेपाल र सिरिष पन्तवीच प्रतिस्पर्धा हुनेछ । एक जना उपाध्यक्ष कर्पोरेटतर्फ (एसोसियट्स) भोजराज कौडाल र राजेन्द्र ओली भीड्नेछन् ।
कार्यसमिति सदस्य महिला तर्फ पूर्णीमा श्रेष्ठ निर्विरोध चयन भइसकेकी छन् भने कार्यसमिति सदस्य क्षेत्रीय संघतर्फबाट पनि रेशमलाल आचार्य निर्विरोध चयन भएका छन् ।
त्यस्तै दुई जना कर्पोरेटतर्फबाट पनि सर्वसम्मतरुपमा जीवन कुमार श्रेष्ठ र रजनी मास्के चयन भएका छन् । ६ जना सदस्य आवश्यक पर्ने उद्योग तर्फ पनि सर्वसम्मत चयन भइसकेका छन् । उम्मेदवार विज्ञानलाल श्रेष्ठले फिर्ता लिएसँगै यसतर्फका कार्यसमिति सदस्य सर्वसम्मत चयन भएका हुन् । जसमा अशोक अधिकारी, इमान्दु बराल, कृष्णप्रसाद रिजाल, रुद्र सुवेदी, लिला बहादुर क्षेत्री र योगिता श्रेष्ठ पिया छन् ।
त्यस्तै वस्तुगतर्फबाट कार्यसमिति सदस्यका लागि ४ जना आवश्यक पर्नेमा सात जनाको उम्मेदवारी छ । गुणराज पौडेल, जनक पौडेल, डोलक प्रसाद पुडासैनी, प्रेम प्रसाद पाण्डे, रविन्द्रकुमार श्रेष्ठ, राजेन्द्र तिवारी र सन्तोषजनक भुषाल छन् ।
वाणिज्यतर्फबाट पनि कार्यसमिति सदस्यमा ६ जना आवश्यक पर्छ तर १२ जनाको उम्मेदवारी परेकोमा सन्जय श्रेष्ठ र विकास थापाले फिर्ता लिएसँगै अन्यवाँकी चुनावी प्रतिस्पर्धामा छन् । विकास श्रेष्ठ, थिरप्रसाद धिताल, दिपा शाही, धनप्रसाद पोखरेल, नरहरि घिमिरे, नारायण प्रधान, महादिप श्रेष्ठ, महेशराज भट्टराइ,राजन पिया र ज्ञानुप्रसाद न्यौपाने छन् ।
निर्वाचनमा ३४३७ मतदाता सहभागी हुनेछन् । मतदानको कार्य अहिले विहान ८ बजेबाट सुरु भएर अपरान्ह पाँच बजे सकिनेछ । आज भएको मतदान भोलि विहान ८ बजेदेखि गन्न सुरु गरिनेछ ।
