चितवन । राजश्व चुहावट र आर्थिक अपराध रोक्न चितवनमा सचेतना सहित अन्तरक्रिया कार्यक्रम गरिएको छ। राजश्व अनुसन्धान विभाग हरिहरभवन ललितपुरको आयोजनामा चितवन उद्योग वाणिज्यसंघमा कार्यक्रम भएको हो।
कार्यक्रममा बोल्दै विभागका निर्देशक मुक्तिराम अर्यालले राजश्व चुहावट नियन्त्रण मुख्य उद्देश्य राखेर राजश्वसंग सम्बन्धित ऐन, कनुन र पछिल्लो अवस्थाबारे जानकारी दिंदै कार्यक्रम गरिरहेको बताए। एैन नजानेर धेरै गल्तीहरु भइरहेको भन्दै राजश्व र विदेशी विनिमयवारे जानकारी गराई अवैध गतिविधि हुन नदिन कार्यक्रम गरिरहेको उनको भनाई थियो । यस अघि पुष १६ गते पोखरामा सम्पन्न भइसकेको र अव विरजञ्जमा भोलि कार्यक्रम गर्ने उनले बताए ।
अहिलेपनि राजश्व अनुसन्धान विभागले चालु आर्थिक वर्षको माघसम्म राजश्व छलीका ४७ वटा मुद्दा दर्ता गरेर १४३ प्रतिवादी संग ४ अर्ब ९९ करोड विगो माग दावी गरिएको उनले बताए । त्यस्तै विदेशी विनिमयतर्फ २६ वटा मुद्दा दर्ता गरेर ४४ प्रतिवादीसंग ८ करोड बढी माग दावी गरिएको बताए ।
राजश्व अनुसन्धान विभागको उद्देश्य मुद्दा चलाउने र अदालती प्रकृयाबाट रकम असुलउपर गर्नुभन्दा प्रचलित कानुनको कार्यान्वयन र यसको ज्ञान दिएर आर्थिक अपराध, राजश्व छली रोक्ने रहेको उनको भनाई थियो ।
कार्यक्रममा मालवस्तु तथा ढुवानी साधनको अनुगमन प्रणाली भीसीटिएसका बारेमा जानकारी दिंदै विभागका कम्प्युटर अधिकृत पवन वस्नेतले सरल र सहज बनाउदै यो प्रणालीको लागू प्रभावकारी देखिएको बताए । ईन्टरनेट लगायतका समस्याले कहिलेकाहीँ प्रणालीमा समस्या हुने बताउदै सुधारको काम भइरहेको जानकारी दिए । अहिले मोवाईलबाट क्युआरकोड प्रयोगगरि प्रणाली संचालन गर्न सकिने उनको भनाई थियो।
कार्यक्रममा बोल्दै बागमती प्रदेशका मुख्य सचिव मुकुन्द प्रसाद निरौलाले सरोकारवालाहरुको सुझावलाई सरकारसमक्ष पुर्याउन आग्रह गरे । भएका ऐन नियम समसामयिक गराउन आवश्यक रहेको भन्दै अझ बढी सचेतनाका कार्यक्रम संचालन गर्न आग्रह गरेका थिए ।
चितवनका प्रमुख जिल्ला अधिकारी अस्मान तामाङले भएका ऐन नियम राम्रोसँग पालना भएमात्रैपनि देशको अर्थतन्त्रमा राजश्वले ठूलो सहयोग पुर्याउने बताए । तर भन्सारका कर्मचारी र व्यापारीको स्वार्थले प्रणाली संस्थागत हुन नसकेको बताए । आफू पर्सा र रुपन्देही हुँदा सुधारका लागि पहल गरेको भन्दै सचेतना कार्यक्रमले चुहावट रोक्न थप सहयोग गर्ने बताए ।
कार्यक्रममा बोल्दै उद्योग वाणिज्य संघ चितवनका बरिस्ठ उपाध्यक्ष (हाल निर्विरोध अध्यक्ष) चुुननारायण श्रेष्ठले विज्ञापन कर ठेकेदारले नभई स्थानीय सरकारले उठाउनुपर्ने बताए । ठेकेदारले उठाउँदा व्यवसायी समस्यामा परेको बताउँदै व्यापार व्यवसाय संचालनका लागि एक जनाले कानुनको थुप्रो पारगर्नुपर्ने वाध्यता रहेको भन्दै सवैलाई समेटर एउटा कानुन बनाएर सहज बनाउन सुझाव दिए ।
कार्यक्रममा चितवन, मकवानपुर र नवलपुरका उद्योगी, व्यवसायीको साथै जिल्ला स्तरीय राजश्व चुहावट अनुगमत समितिका पदाधिकारी लगायतको सहभागीता थियो । कार्यक्रममा उठेका सुझावलाई सरकार समक्ष पुर्याउने कार्यक्रमका अध्यक्ष एवम् विभागका निर्देशक तथा सूचना अधिकारी कृष्ण प्रसाद पाण्डेको भनाई थियो ।
कार्यक्रमको सहजीकरण विभागका कर्मचारी मधु भट्टराई गरेका थिए ।
