चितवन । उद्योग वाणिज्य संघ चितवनको अध्यक्षमा चुननारायण श्रेष्ठ सर्वसम्मत चयन भएका छन् । २०६६ सालदेखि कार्यसमिति सदस्य हुदै तृतीय उपाध्यक्ष, प्रथम उपाध्यक्ष र २ पटक बरिष्ठ उपाध्यक्ष भइ काम गरिसकेका श्रेष्ठ यो पटक सर्वसम्मत अध्यक्षमा चयन भएका हुन् । श्रेष्ठले विहान मात्रै आफूलाई अध्यक्ष पदमा,बरिष्ठ उपाध्यक्षमा सुमनकुमार श्रेष्ठ,उपाध्यक्षमा चिरञ्जीवी सुवेदी,भोजराज कौडाल र शंकर नेपालले उम्मेदवारी घोषणा गरेका थिए ।
तर आज साँझसम्म अध्यक्ष सहित बरिष्ठ उपाध्यक्षमा सुमनकुमार श्रेष्ठ पनि सर्वसम्मत चयन भएका छन् । उपाध्यक्ष उद्योग तर्फ चिरञ्जीवी सुवेदी, महिला सदस्यमा पूर्णिमा श्रेष्ठ, क्षेत्रीय सदस्यमा रेशमलाल आचार्य सर्वसम्मत चयन भएका छन् । कर्पोरेट सदस्यमा डा. जीवनकुमार श्रेष्ठ र रजनी मास्के सर्वसम्मत चयन भएका छन् ।
उपाध्यक्ष वाणिज्यतर्फ शंकर नेपाल र शिरिष पन्त, कर्पोरेटतर्फ भोजराज कौडाल र राजेन्द्र ओलीको उम्मेदवारी परेको छ ।सदस्य उद्योगतर्फ ६ जनाका लागि ७ जना, वाणिज्यतर्फ ६ जनाका लागि १२ जना र वस्तुगततर्फ ४ जनाका लागि ७ जनाको उम्मेदवारी परेको छ । उम्मेदवारी फिर्ता गर्ने समय २६ गते दिउसो साढे १२ बजेसम्म तोकिएको छ । उम्मेदवारहरुको अन्तिम नामावली २६ गते दिउसो १ बजे सार्वजनिक गरिनेछ ।
सर्वसम्मत हुन नसकेका पदहरुमा फागुन ३० गते सोमबार मतदान हुने मुख्य निर्वाचन अधिकृत राजकुमार श्रेष्ठले जानकारी दिए । ३० गते विहान ८ बजेदेखि दिउसो ५ बजेसम्म मतदान हुने तालिका छ । मतदान स्थल उद्योग वाणिज्य संघ चितवनको कार्यालय नारायणगढ निर्धारण गरिएको छ । प्रमुख निर्वाचन अधिकृत श्रेष्ठका अनुसार चैत १ गते मतगणना कार्यतालिका रहेको छ । ५५ औँ साधारण सभा तथा अधिवेशनले दुई वर्षे कार्यकालका लागि २९ सदस्यीय नयाँ कार्यसमिति चयन गर्नेछ ।
