चितवन । चितवन जिल्ला खेलकुद विकास समितिका नव नियुक्त अध्यक्ष उत्तम गुरुङले पदभार ग्रहण गरेका छन् । वाग्मती प्रदेश खेलकुद विकास परिषद्ले फागुन ११ गते गरेको निर्णयअनुसार चितवन जिल्ला खेलकुद विकास समितिको अध्यक्षमा गुरुङ नियुक्त भएका हुन् ।

पदभार ग्रहण गर्दै अध्यक्ष गुरुङले चितवनको खेलकुद विकासका लागि आफूले सक्दो पहल गर्ने बताए । पछिल्लो समय कोरोनाका कारण सुस्ताएको खेलकुदको गतिविधिलाई पुनः माथि उकास्न आफ्नो कार्यकालमा भूमिका खेल्ने उनको भनाइ छ ।

आगामी दुई वर्षे कार्यकालका लागि गुरुङ अध्यक्षमा नियुक्त भएका हुन् । पदभार ग्रहणसँगै गुरुङलाई चितवन जिल्ला खेलकुद विकास समितिका कार्यालय प्रमुख रामजी ढकाल सहितका कर्मचारीहरुले स्वागत तथा बधाई ज्ञापन गरेका थिए । गुरुङ यस अघि पनि एक कार्यकाल चितवन जिल्ला खेलकुद विकास समितिको अध्यक्ष भइसकेका छन् ।