चितवन । निम्बार्क वैष्णव परिषद नेपालको पाँचौ केन्द्रीय महाधिवेशन स्याङ्जामा हुने भएको छ । आज गँैडाकोटमा पत्रकार सम्मेलन गरी यही चैत्र ६, ७ र ८ गते अधिवेशन गर्ने अध्यक्ष हरिशरण उपाध्यायले जानकारी दिए ।
हिन्दुधर्मको संरक्षण र मानव सेवाका लागि साहाकारी र अहिँसावादीहरुको संगठन वैष्णव परिषद नेपालले चारवर्षका लागि नयाँ नेतृत्व चयन गर्नेछ । स्याङ्जाको केलादीघाटमा हुने महाधिवेशनमा देशभरबाट करिव १ हजारको सहभागीता रहने महासचिव तुलसीशरण उपाध्यायले जानकारी दिए । ती मध्ये करिव ३ सय प्रतिनिधि रहने र सोही अवसरमा चार वर्षका लागि संस्थागत नीति तथा कार्यक्रम तय गर्ने आयोजकले जनाएको छ ।
वैष्णव समाजमा युवा तथा नारी जागरण ल्याउन निम्बार्क वैष्णव परिषद अन्तर्गत संस्थाको विद्यान अनुसार चाँडै मातृशक्ति परिषद तथा युवाशक्ति परिषद केन्द्रीय तदर्थ समितिको समेत गठन गरिने भएको छ ।
नैतिक शिक्षा नहुँदा मानिसमा विकृत गतिविधि बढीरहेको भन्दै ती गतिविधि निर्मूल पार्दै सभ्य र नैतिक समाज निर्माणमा परिषदले भूमिका खेल्ने बताइएको छ ।
भगवच्छरण देवाचार्यजी महाराजाले नै नेपाल भित्राएका यो विचारलाई संस्थागत गराउन नेपालमा २०१३ सालदेखि सुरु भएको हो । परिषदको केन्द्रीय कार्यालय विराटनगरमा छ भने सम्पर्क कार्यालय गैँडाकोट १ मा रहेको छ । अहिलेको अधिवेशन सोही विचार विस्तार गर्न सुरु गरिएको राधादामोदर मन्दिर केलादी घाट स्याङ्जामै अधिवेशन गरिने आयोजकले जनाएको छ ।
हिमाली जिल्ला वाहेक अन्य सवै ठाउँमा परिषदले आफ्नो शाखा विस्तार गरिसकेको छ ।
