चितवन, फागुन १५ । धार्मिक पर्यटक बढाउन नारायणगढको गौरेश्वर पशुपति मन्दिरले दुई दिने रजत महोत्सव गर्ने भएको छ । पत्रकार सम्मेलनको आयोजना गरी भोलि र पर्सी दुई दिन गौरेश्वर पशुपति मन्दिर रजत महोत्सव २०७८ हुने जानकारी दिइएको हो ।
मन्दिरका अध्यक्ष सुर्य कुमार प्रकाण्ड पियाका अनुसार देवघाटमा आएका पर्यटकलाइ समेत आकर्षित गराउन महोत्सवले थप सहयोग पुग्ने बताए । नारायणी नदी किनारमा रहेको मन्दिर २०५० सालमा स्थापना भएको हो । स्थापनाको २८औँ वर्ष प्रवेश अवसर पारेर गरिने महोत्सवको तयारी पूरा भएको आयोजकले जनाएको छ ।
रजत महोत्सवको गलेश्वर आश्रम देवघाटधामका पीठाधिश अन्नतश्री विभुषित महामण्डलेश्वर स्वामी आत्मानन्द गिरीले उद्घाटन गर्नुहुने आयोजकले जनाएको छ ।
भोलि विहान साँढे ७ बजे शोभायात्रा, साँढे ११ बजे उद्घाटन, मध्यान्न १२ बजे स्मारिक विमोचान, सम्मान, फागुन १७ गते विहान देखि शिव पुजन तथा अर्जना गर्ने लगायतका कार्यक्रम रहेका छन् ।
२०५० सालदेखि हालसम्म १० हजार भन्दा माथि आर्थिक सहयोग गर्ने चन्दा दाताहरुलाई सम्मान गर्ने कार्यक्रम रहेको हो । हिन्दुहरुको आस्थाको केन्द्र भएकाले पनि यसको विकास र थप पर्यटक भित्राउन विभिन्न योजना बनाएको मन्दिर समितिले जनाएको छ । नारायणगढमै रहेकाले पनि मन्दिरमा विवाह व्रतवन्ध गर्न धेरै मानिसहरु आउने गरेका छन् ।
देशकै मध्यभागमा अवस्थित मन्दिर निर्माण गर्न २०४५ मा भरतलाल प्रधानको अध्यक्षतामा ९ सदस्यीय मन्दिर निर्माण समिति गठन गरेर तत्कालिन भरतपुर नगर पञ्चायतबाट निर्माणको स्वीकृती लिएर २०५० सालमा निर्माण गरिएको हो ।
भरतपुर २ का सुर्य कुमार प्रकाण्ड पिया र उनीकी श्रीमती चिनीदेवी पियाबाट निजी लगानीमा मन्दिर, पुजारी निवास कक्ष र कम्पाउण्ड वालसमेत निर्माण भएको हो ।
पछि गौरेश्वर पशुपतिमन्दिर संचालक समितिमा परिणत भएर २०७५ सालमा पियाको अध्यक्षतामा १३ सदस्यीय मन्दिर व्यवस्थापन समिति पुन गठन गरेर विकास र संरक्षणको कार्य हुँदै आएको छ ।
