चितवन, फागुन १४ । कोरोना भाइरसको जोखिम बढेपछि उद्घाटनको संघारमा रोकिएको रत्ननगर महोत्सव भोलिदेखि हुने भएको छ । भोलिदेखि सुरु हुने महोत्सवको सवै तयारी पूरा भएको आयोजक रत्ननगर उद्योग वाणिज्य संघका अध्यक्ष अनिलकृष्ण श्रेष्ठले जानकारी दिए ।
यस अघि प्रशासनको आदेशमा मानविय हितलाई ध्यान दिएर सवै तयारी पूरा भएपनि महोत्सव स्थगित गर्नुपरेको उनले बताए । आज महोत्सव स्थल टिकौली चउरमा पत्रकार सम्मेलन गरेर आयोजकले महोत्सवको सवै तयारी पूरा भएको जानकारी दियो । उद्घाटनको अघिल्लो दिन महोत्सव रोकिदा धेरै चिन्तित बनाएको भन्दै फागुन १५ देखि २३ सम्म चल्ने अवको महोत्सवले कृषि, पर्यटन, व्यवसाय आदिलाई माथि उठाउन मद्दत मिल्ने आयोजकको भनाई छ ।
यस अघि पौष २७ गतेदेखि महोत्सव गर्ने अन्तिम चरणमा रोकिने पुगेको थियो । महोत्सवमा ४५० वटा स्टल रहने छ । महोत्सवको तयारी पूरा भएको र वागमती प्रदेशका उद्योग वाणिज्य आपूर्ति मन्त्री मिलनवावु श्रेष्ठले उद्घाटन गर्ने आज पत्रकार सम्मेलन गरी जानकारी दिइएको हो ।
पूर्वी चितवन सहित जिल्लाको कृषि,पर्यटन,व्यवसायलाई जोड दिएर महोत्सव आयोजना गरिएको महासचिव निराजन खनालले जानकारी दिए ।
साथै फागुन १६ देखि चार दिन फुड फेस्टिवल समेत संचालन गरिने बरिष्ठ उपाध्यक्ष शकर गिरीले बताए । फुडफेस्टिवल सौराहा चोकमा हुनेछ ।
यो पटक सौराहामा जीप लाइन को नयाँ आयाम थप्न सकिने सम्भावनालाई ध्यान दिएर जीप लाइनको मज्जा लिन सकिने पूर्व अध्यक्ष राजाराम रेग्मीले बताए ।
महोत्सव स्थल वन्यजन्तु समेत आउनेजाने ठाउँ भएकाले लामो समय संरचना राखिएको भन्दै आलोचना हुँदै आएको थियो । तर विषम परिस्थितीले त्यसो हुन गएको र वन्यजन्तुको संरक्षण र त्यसको वासस्थानमा सदैव चासो रहेको आयोजकको भनाई थियो ।
