चितवन, फागुन ११ । विदेशमा हासिल गरेको सीप र ज्ञानलाई स्वदेशमा प्रयोग गरी आर्थिक विकास तथा उद्यमशीलता विकास गर्न नेकपा एमालेको कान्छो जनवर्गीय संगठन ‘रिटर्नी फेडेरेशन नेपाल चितवनमा पनि गठन गरिएको छ ।
नेकपा एमालेले आफ्नो २२औँ जनवर्गीय संगठनको रुपमा रिटर्नी फेडेरेशन नेपालको शाखा चितवनमा पनि विस्तार गरेको हो । आज भएको जिल्ला भेलाले दिलकुमार श्रेष्ठको अध्यक्षतामा नयाँ तदर्थ समिति बनाएको हो ।
समितिको उपाध्यक्षमा बुद्धिराज अर्याल, सुलभ वन्धु पोखरेल, सचिवमा अमृत घिमिरे, उप सचिवमा सन्जय महतो र सुरेश मरहठ्ठा चयन भएका छन् । २१ सदस्यीय समितिमा अहिले कोषाध्यक्ष र केही सदस्य खाली रहेका छन् । खाली रहेको पदहरुमा पछि मनोनित गरिने संगठनका केन्द्रीय सदस्य एवम चितवन जिल्ला इन्चार्ज मनोज अर्यालले जानकारी दिए ।
तदर्थ समितिको सदस्यहरुमा पदम अधिकारी, सन्जय न्यौपाने, श्रीकृष्ण चापागाई, गोविन्द ढकाल, खगराज पौडेल,धनराज कडेँल,कमल थापा,राज बम्जन, राम बहादुर कुँवर रहेका छन् ।
तदर्थ समितिले थप सदस्यहरु विस्तार गर्ने,अन्य पालिकाहरुमा पनि कमिटि गठन गर्ने र केन्द्रीय महाधिवेशन पछि जिल्लामा समेत महाधिवेशन गर्ने अर्यालले जानकारी दिए।
नेकपा एमालेको पार्टी कार्यालय चितवनमा भएको उद्घाटसत्रमा बोल्दै प्रमुख अतिथि पोलिटव्यूरो सदस्य देवी ज्ञवालीले कान्छो संगठन भएपनि फरक कोण र उद्देश्य लिएर आएको बताए । विदेशबाट सीप र ज्ञान लिएर नेपाल फर्कीएका व्यक्तिहरुलाई समावेश गरेर बेरोजगार हुन नपर्नेगरी उद्यमशीलता विकासमा यो संगठनले महत्वपूर्ण काम गर्ने विश्वास व्यक्त गरे । एक जिल्लामा रिटर्नीहरुले हासिल गरेको अनुभव अर्को जिल्लामा साटासाट गर्ने र रोजगारी सृजना समेत हुनेगरी संगठन अघि वढ्न आग्रह गरे । अहिलेको सरकार र अर्थमन्त्रीले लिएको गलत अर्थ नीतिले देशको अर्थतन्त्र डामाडोल भएको बताउँदै पुन एमालेको सरकार आवश्यक भएको औँल्याए ।
विशिष्ट अतिथि प्रदेश सांसद एवम पूर्व मन्त्री विजय सुवदीले राजनीतिलाई पेशा बनाएकाहरुलाई गतिलो जवाफ दिनेगरी रिटर्नी फेडेरेशन अगाडि बढेको भन्दै उद्यमशीलतामा जोडिन गरिएको कार्य प्रसंसनीय भएको बताए । विदेशबाट सीप हासिल गरेर आएकादेखि दुखमा परेकाको पनि साहारा वन्ने बताउँदै विकासको अभियानमा जोडीएर सुखी नेपाली समृद्ध नेपालको महाअभियान साकार पार्नेगरी अघि बढ्न आग्रह गरे ।
कार्यक्रममा बोल्दै संगठनका बरिष्ठ केन्द्रीय उपाध्यक्ष एवम यसका अभियान्ता उत्तम अधिकारीले १ भिषा अवधि सकाएर र कम्तीमा १० वर्ष स्वदेश बस्ने योजना बनाएका व्यक्तिहरुलाई संगठनमा जोड्दै जाने बताए । विदेशमा नेपालीले कमाएको सीप क्षमता सदुपयोग गर्न राज्यले नसकिरहेकाले राजनीति मार्फत आर्थिक समृद्धिमा लाग्न संगठन बनाएको बताए । अव चाँडै विदेशबाट फर्कीएका नेपालीहरुलाई कसरी देशको आर्थिक विकास र समृद्धिमा जोड्न सकिन्छ भन्ने विषयमा बहस चलाएर नीति नियम बनाउन दबाब दिने बताए ।
