गैँडाकोट । जिल्ला टुक्रीएर दुइ जिल्ला नवलपरासी पश्चिम र पूर्व बन्यो तर मालापोत र नापी कार्यालयको सेवा लिन अझैपनि जनतालाई सास्ती उस्तै छ । यही सास्तीको अन्त्यका लागि कावासोतीमा मुख्य कार्यालय रहेका दुवैको शाखा गैँडाकोटमा ल्याउन पहल थालिने भएको छ ।
गैँडाकोट नगरपालिकाको आज सम्पन्न दशौँ नगरसभामा गैँडाकोटमा मालापोत र नापीको शाखा ल्याउन नीतिगत निर्णय गरिने भएको हो ।
सभामा नगरसभा सदस्य गोविन्द कोइरालाले मालापोत र नापीको सेवा लिन अझैपनि उस्तै सास्ती रहेको र जनताले सहजै सेवा नपाएको व्यापक गुनासो आएको बताउँदै शाखा ल्याउन पहल थाल्पनुपर्ने विषय उठान गरेका थिए ।
सभामा बोल्दै कोइरालाले भने,“मालपोत कार्यालयमा जाँदा अहिलेपनि कहाँ आएको हो ? किन आएको हो ? कसको देशमा आएको हो ? जस्तो लाग्छ । कमसेकम हाम्रो यो नगरपालिकामा शाखा ल्याएर मात्रै जनतालाई सेवा दिन पाएको भए धेरै राम्रो काम हुन्थ्यो । ”मालपोत कार्यालय नवलपुरबाट सेवा लिन अझैपनि जनतालाई उस्तै सकस छ । लामो लाइन बस्नुपर्ने, लाइन बसेपनि सेवा नपाउने, विचौलियाका कारण दुख पाइरहनुपर्ने लगायतका समस्या सेवाग्राहीले गरिरहेका हुन्छन् । उक्त अस्तव्यस्त सेवालाई शाखा कार्यालयको रुपमा गैँडाकोटमै ल्याउनका लागि पहल थाल्न उनले आग्रह गरेका थिए ।
जवाफमा नगरप्रमुख छत्रराज पौडेलले प्रमुख प्रशासकीय अधिकृतलाई नीतिगत निर्णय गर्न आदेश दिएका हुन् । नीतिगत निर्णय गरेर प्रकृया अगाडि बढाउने नगरप्रमुख पौडेलको भनाई थियो ।
अरु विकासमा आफू सन्तुष्ट रहेको भन्दै आफ्नो वडामा कुना कुनामा सडक पुगेको बताए । कुनैवेला साइकल समेत जान नमिल्ने सडक हुँदा मोटरसाइकल पुगेको भन्दै व्यक्तिगत स्वार्थमा कोही जनप्रतिनिधि नगएको उनको दावी थियो ।
केही तीतामीठा अनुभव रहेपनि सो कुरा जनताका लागि नै भएको भन्दै अव मालपोत र नापीको शाखा ल्याउन सवैले पहल गर्नुपर्ने बताए ।
