चितवन । नारायणी उर्लदा हुनसक्ने सम्भावित क्षतीलाई रोक्न तटबन्ध गरिने भएको छ । त्यसका लागि दोस्रो चरणको ठेक्का आह्वान भएको भरतपुर महानगरपालिकाकी मेयर रेनु दाहालले जानकारी दिइन् ।
नारायणी नदी तटबन्धन व्यवस्थापन आयोजना भरतपुरले बुधबार ठेक्काको सूचना जारी गरेको हो । नारायणी नदीको तटबन्धको दोस्रो प्याकेज भरतपुर महानगरपालिका–१७ गाँजीपुरदेखि भरतपुर–२६ को हीरापुरसम्मको पाँच किलोमिटर क्षेत्रमा कंक्रिट ब्लक सहित ग्याबिन जालीका लागी ९९ करोडको टेण्डर आव्हान भएको उनको भनाई छ ।
नारायणी नदीमा आएको बाढी बस्ती पस्ने वर्षेनी समस्यालाई रोक्न ५ अर्बको तटबन्ध निर्माण सुरु गरिएको हो । निर्माणका लागि पहिलो खण्डको बोलपत्र आह्वान भइसकेको छ । बाँकी ३ खण्डको पनि यही महिनाभित्र बोलपत्र आह्वान गर्ने गरी काम अघि बढाइएको आयोजनाले जनाएको छ ।
पाँच खण्डमा विभाजन गरेर बोलपत्र आह्वान गर्ने व्यवस्था गरिए अनुसार यो दोस्रो खण्डको ठेक्का आह्वान भएको हो । आयोजना प्रमुख रवीन्द्र थापाले कंक्रिटको ब्लक, जाली र साना ठूला ढुंगा राखेर त्यहाँ तटबन्ध निर्माण गरिने बताए । ‘तीन मिटरदेखि ४.५ मिटरसम्म उचाइको तटबन्ध निर्माण गरिने छ ।
त्यसमा चितवन र नवलपरासीतर्फ तटबन्धका लागि २३ अर्ब ५८ करोड ४३ लाख रुपैयाँ खर्च लाग्ने प्रस्तावित लागत आएको छ । सोमध्ये पहिलो चरणमा पाँच अर्बको कामका लागि बहुवर्षीय खरिद कार्य अघि बढाउन बजेट सुनिश्चितताका लागि अर्थ मन्त्रालयमा फाइल पठाइएको थियो। मन्त्रालयले ५ अर्ब बराबरको बजेटको स्रोत सुनिश्चतता गरेपछि आयोजनाको काम अघि बढेको हो ।
नारायणी नदीका कारण चितवनतर्फ भरतपुर महानगरपालिका र नवलपरासीतर्फ गैंडाकोट, देवचुली, कावासोती र मध्यबिन्दु नगरपालिका एवं विनयत्रिवेणी गाउँपालिका प्रभावित हुँदै आएका छन ।
