डोलराज रानाभाट
नवलपुर । धार्मिक पर्यटक भित्राउदै धर्म संस्कृतिको संरक्षणका लागि निर्माण गरिएको हनुमान मन्दिरले ठोस आकार लिएको छ । नवलपुरको गैँडाकोट नगरपालिका वडानम्वर ९ थुम्सीमा निर्माणाधीन मन्दिरको हालसम्म ८५ प्रतिशत काम सम्पन्न भएको मन्दिर समितिका सह–सचिव पिताम्बर सापकोटाले जानकारी दिए ।
उनका अनुसार अहिलेसम्म मन्दिरमा मार्वल बिछ्याउने, मन्दिरको गर्भगृहमा काष्ठकलाको कलात्मक प्रवेशद्वार निर्माण गर्ने र रामदरबारका भित्ते मूर्तिहरू निर्माण कार्य जारी रहेका छन् । त्यस्तै मन्दिरको रङ्ग रोगन ,कलात्मक लाइटिङ सिस्टम र मन्दिर वरिपरिको प्राङ्गणमा मोजाइक टायल बिछाउने कामलाई पनि तीव्र पारिएको सापकोटाले बताए ।
कोरोना महामारीले ठूलो रुप नलिए आगामी हनुमान जयन्तीको अवसरमा भव्य यज्ञ आयोजन गरी हनुमानको मूर्तिप्राणप्रतिष्ठा गर्ने, नवनिर्मित मन्दिरको समुद्घाटन तथा महायज्ञ समेत गर्ने तयारी रहेको सापकोटाको भनाई छ ।
सोही अवसरमा मन्दिरको समुघाटन सहित दातासम्मान कार्यक्रम गर्ने लक्ष्य रहेको हो । मन्दिर निर्माणपश्चात महेन्द्र राजमार्गको छेउमै रहेकाले धेरै धार्मिक पर्यटक भित्राउन मद्दत मिल्ने समितिले विश्वास लिएको छ ।
२०७५ वैशाख २९ गते गंगादशहराका दिन शिलान्यास गरिएको निर्माणाधीन शिखर खजुराब शैलीको हनुमान मन्दिर निर्माण लागत ३ करोड अनुमान गरिएको छ । हालसम्म २ करोड २० लाख खर्च भइसकेको छ भने महायज्ञसम्म थप ६० लाखको काम बाँकी रहेको सहसचिव सापकोटाको भनाई छ ।
बाँकी काम सम्पन्न गर्न आबश्यक आर्थिक स्रोतका लागि समितिले धर्मानुरागी श्रद्धालु भक्तसज्जनहरुलाई आह्वान समेत गरेको छ । आर्थिक स्रोत व्यबस्थापनमा सहयोग गरी मन्दिर निर्माणलाई चाँडै पूर्णता दिन सकिने भन्दै मन्दिर समितिले सक्दो सहयोगका लागि आग्रह गरेको हो ।
