चितवन । प्रेस चौतारी चितवनले २४औँ स्थापना दिवस मनाएको छ । दिसका अवसरमा आज भरतपुरमा आयोजित वन्यजन्तु संरक्षण र विकासः आवश्यकता र चुनौती नामक अन्तरक्रिया कार्यक्रम आयोजना गरेको थियो ।
सोही कार्यक्रममा बोल्दै चितवनका संरक्षणकर्मीहरुले वन्यजन्तुको संरक्षण गर्न माग गरेका छन् । पछिल्लो समय विकासका कार्यहरुले वन्यजन्तु र तिनीहरुको वासस्थान संकटमा पर्दै गएको भन्दै समयमै वातावरणलाई सरक्षण गरि वन्यजन्तुमैत्री विकास गर्न आह्वान गरिएको छ ।
सरक्षणकर्मीहरुले तत्काल ऐन नियमनै बनाएर विकास गर्दा मावनलाई मात्रै नभई वन्यजन्तुका लागि समेत हुनेगरी काम गर्न आग्रह गरेका हुन् ।
प्रेस चौतारी नेपाल चितवन शाखाले आज गरेको कार्यक्रममा बौल्दै राष्ट्रिय प्रकृति संरक्षण कोष सौराहाका प्रमुख बाबुराम लामिछानेले निकुञ्ज र वरण्डभार क्षेत्र समेत रहेको चितवनमा वन्यजन्तुमैत्री विकास नभए भएको प्रतिष्ठा समेत गुम्ने बताउनुभयो । अहिले वन्यजन्तुमैत्री पूर्वाधार निर्माण निर्देशीकाको मस्यौदा तयार पारेर मन्त्रालय पठाएको र यो चाँडै कार्यान्वयनमा आउनुपर्ने बताउँदै विकास निर्माणका काम गर्दा वन्यजन्तुका लागि समेत संरचना बनाउन वाध्यकारी अवस्था हुने बताउनुभयो । विकासका कार्य गर्दा निर्माणका क्रममा,संचालन हुँदा र दीर्घकालिन गरी तीन चरणमा वन्यजन्तु जोखिममा पर्ने भन्दै वन्यजन्तु जोगाउन गर्नुपर्ने कार्यमा ढिलाई गर्न नहुने बताउनुभयो ।
कार्यक्रममा बोल्दै राष्ट्रिय सभा सदस्य पार्वती रावलले अव वन्ने ऐन नियम संशोधन गरी वन्यजन्तुमैत्री बनाउने तर त्यसका लागि विशेषज्ञहरुले सुझाव दिन भन्नुभएको थियो । धेरै पुराना ऐन कानुन हुँदा समस्या भएको भन्दै त्यसलाई संशोधन गर्न आफूले पहल गर्ने तर के कस्ता प्रावधान राख्ने भन्ने सल्लाह दिन आग्रह गर्नुभयो ।
कार्यक्रममा बोल्दै निर्माण व्यवसायी संघ चितवनका अध्यक्ष उमानन्द कडेँलले गल्ती सरकारी कार्यालयहरुले गर्ने तर दोष निर्माण व्यवसायी माथि थुपार्ने गरिएको भन्दै असन्तुष्ट व्यक्त गर्नुभयो । विकास निर्माणको काम गर्दा गर्नुपर्ने वातावरणी प्रभाव मूल्याङ्कन ठेक्का खोल्ने कार्यालयले गर्नुपर्ने तर काम विग्रिएपछि निर्माण कम्पनीहरुलाई दोष दिने प्रवृत्तिको अन्त्य हुनुपर्ने बताउनुभयो । वन्यजन्तु संरक्षण गर्ने दायित्व सवैको भएको भन्दै सरल र सहज कानुन बनाउँदै कार्यान्वयन गर्नुपर्नेमा जोड दिनुभयो ।
कार्यक्रममा बोल्दै मध्यवर्ती क्षेत्र व्यवस्थापन समितिका अध्यक्ष प्रकाश ढुंगानाले वन्यजन्तु मर्नु सामान्य विषय नभएको र चितवन सहित नेपालको उचाई विश्वमा पुर्याउन सहयोग गर्ने वन्यजन्तुहरु जुनसुकै तवरबाट बचाइरहन पर्ने बताउनुभयो । आज चितवन निकुञ्ज र यहाँ पाइने वन्यजन्तुका कारण चर्चित रहेको भन्दै संरक्षण नगरी विकास गर्न कसैले सम्झौता गर्न नसक्ने प्रष्ट पार्नुभयो ।
कार्यक्रममा बोल्दै निकुञ्जका सूचना अधिकारी गणेश प्रसाद तिवारीले विकास र संरक्षण सँगसँगै लैजानुपर्ने बताउँदै आगामी दिनमा सवै सचेत हुनुपर्ने बताउनुभयो ।
जिल्ला अध्यक्ष सुवास पण्डीतको अध्यक्षतामा कार्यक्रम भएको थियो । चितवन निकुञ्ज र मध्यवर्तीका कारण चिरपरिचित रहेको भन्दै वन्यजन्तुको संरक्षण सहितको विकास अपरिहार्य भएकाले स्थापना दिवसमा यसरी अन्तरक्रिया कार्यक्रम राखेको जानकारी दिनुभयो । केन्द्रको २४औँ स्थापना दिवस भएपनि चितवनको भने २२औँ भएको संस्थापक अध्यक्ष रामवावु सुवेदीले बताउनुभयो । स्थापना देखिनै प्रेस चौतारी चितवन श्रमजीवि पत्रकारहरुको हकहितका लागि लड्दै आएको जानकारी दिनुभयो ।
