काठमाडौं । देशको सबैभन्दा पहिलो टेलिभिजन नेपाल टेलिभिजन आजदेखि ३८औँ वर्षमा प्रवेश गरेको छ । २०४१ साल माघ १७ गते स्थापना भएको नेपाल टेलिभिजनले ३७ वर्ष पार गरेको हो । २०४२ साल पुस १२ गते संस्थानमा परिणत भएको नेपाल टेलिभिजनले २०४२ सालकै पुस १४ गतेदेखि नियमित प्रसारण सुरु गरेको हो ।
२०५८ सालदेखि भू(उपग्रह मार्फत आफ्नो प्रसारण जोडेको नेपाल टेलिभिजनले हाल आफ्ना ५ वटै च्यानललाई एच डि प्रविधि मार्फत देशको ७२ प्रतिशत जनसंख्यामा र ५२ प्रतिशत भूगोल पहुँच विस्तार गर्न सफल भएको जनाएको छ । यसैगरी विश्वका १४० भन्दा बढी मुलुकमा यसको प्रसारण देख्न सकिन्छ ।
स्थानीय जनताको सरोकारलाई प्राथमिकता दिई प्रसारण गर्न प्रादेशिक च्यानलहरु स्थापनाका साथै २१ वटा रिले स्टेशन मार्फत भू सतही मार्फत पनि प्रसारण पहुँचलाई निरन्तरता दिंदै आएको छ । यसवर्ष कोरोना महामारीका कारण आफ्नो स्थापनाको दिनलाई नेपाल टेलिभिजनले भर्चुअल माध्यमबाट मनाउँदैछ । यसक्रममा आज बिहान ११ बजेपछि भर्चुअल विशेष कार्यक्रम प्रत्यक्ष प्रसारण ५ वटै च्यानलवाट गर्ने भएको छ ।
