चितवन । नेकपा एमालेका प्रभावशाली नेता एवम् पोलिटब्यूरो सदस्य महेश बस्नेतले गठवन्धन चुनावमा हार्ने डरले स्थानीय तहको चुनाव सार्ने प्रपञ्च गरेको बताएका छन् ।
पूर्वमन्त्री समेत रहेका बस्नेतले माधव नेपाललाई काँग्रेस सँग मिलेर मात्रै होइन काँग्रेसभित्रै प्रवेश गरी एमालेसँग चुनाव लड्न खुलमखुल्ला चुनौति समेत दिएका छन् ।
प्रेस चौतारी नेपाल चितवन शाखाले आज भरतपुर विमानस्थलमा गरेको पत्रकार सम्मेलनमा बौल्दै बस्नेतले भने,“चुनाव कुनै हालतमा सार्न पाइदैन । बैशाख २१ गते पछाडि स्थानीय चुनावको मिति लगे एमालेले आन्दोलन सुरु गर्छ । अदालतमा पनि मुद्दा पर्न सक्छ र संविधान अुनसार किनारा लाग्नेछ । त्यसैले गठवन्धनलाई चुनाव सार्ने कुनै बाटो छैन ।”
फागुन २० गतेदेखि राष्ट्रिय सभा सदस्यको म्याद सकिनै लाग्दा माघ १२ गतेनै अर्थात एक महिना अगाडिनै चुनाव गराउन सक्ने गठवन्धनले स्थानीय चुनावको मिति सार्न कुनै छुट नभएको बताए । उनले भने,“स्थानीय तहका पदाधिकारीको अवधि वैशाख २१गते सकिनै लाग्दा चैतमै निर्वाचन हुनुपर्ने तर वैशाख २१ गते कटाउनु हुँदैन । मिति घोषणा नभए एमालेले आन्दोलन सुरु गर्नेछ ।”
अदालतले पनि ठिक समयमा स्थानीय चुनाव गराउन भूमिका खेल्नुपर्ने बताउँदै तीनै तहको चुनाव एकै समय गराउन सकिने माधव नेपाल लगायतको तर्क व्यवहारिक नभएको उनको भनाई थियो ।
कार्यक्रममा बोल्दै नेकपा एमालेका नेता कृष्णभक्ता पोखरेलले संविधानमा प्रष्ट व्यवस्था भएको र कुनै कुरा नबाझिएको दावी गरे । चुनाव हार्ने डरले मात्रै संविधानमा कमजोरी देखाउने प्रयास गरएको उनको भनाई थियो ।
जिल्ला अध्यक्ष सुवास पण्डीतको अध्यक्षतामा भएको कार्यक्रमको सहजीकरण मुकुन्द भुषालले गरेका थिए।
