नारायणगढ । नारायणी कला मन्दिरको अध्यक्षमा सुवीर श्रेष्ठ निर्वाचित भएका छन् । सोमबार सम्पन्न अधिवेशनबाट श्रेष्ठको अध्यक्षतामा नयाँ कार्यसमिति चयन गरिएको हो । आगामी दुई वर्षे कार्यकालको लागि कार्यसमिति सदस्यहरूमा हरिकुमार राजभण्डारी, सुष्मिता श्रेष्ठ, सनदकुमार पिया, सरला जोशी, प्रवीणकुमार श्रेष्ठ, हर्षमान श्रेष्ठ, रामशरण सिलवाल, शालिकराम सापकोटा, सुसनलाल प्रधान, रोहितकुमार श्रेष्ठ र अनुकुल श्रेष्ठलाई चयन गरिएको निर्वाचन समितिका संयोजक बद्रीलाल प्रधानले जानकारी दिए ।

कार्यसमितिमा आवश्यक संख्यामा मात्रै उमेदवारी दर्ता गराएको हुँदा सर्वसम्मतरूपमा नयाँ कार्यसमिति चयन भएको उनले बताए । अध्यक्षबाहेकका पदाधिकारीको जिम्मेवारी बाँडफाँड नयाँ कार्यसमितिको पहिलो बैठकबाट टुंगो लगाउने प्रावधान रहेको कला मन्दिरका निवर्तमान अध्यक्ष उद्धव जोशीले जानकारी दिए । कोरोना भाइरस संक्रमण जोखिमका कारण जिल्ला प्रशासनबाट जारी आदेशानुसार स्वास्थ्य सुरक्षाका सबै मापदण्ड पालना गर्नुका साथै सीमित व्यक्तिहरूको उपस्थितिमा अधिवेशन सम्पन्न गरिएको हो ।

नवनिर्वाचित कार्यसमितिले सोमबार अधिवेशन सकेलगत्तै पदभारसमेत ग्रहण गरिसकेका छन् । वि.सं.२०१९ सालमा स्थापना भएको कला मन्दिरले हरेक दुई÷दुई वर्षको अन्तरालमा नयाँ नेतृत्व चुन्दै आएको छ । कला मन्दिरका पूर्व अध्यक्ष एवम् उद्योग वाणिज्य संघ चितवनका अध्यक्ष राजु श्रेष्ठसहित कला मन्दिरका पूर्वअध्यक्षहरूको उपस्थितिमा पदभार ग्रहण गरिएको हो ।

सोही अवसरमा चितवन महोत्सवको १३औँ संस्करणमा सांस्कृतिक कार्यक्रममार्फत महोत्सवमा सहभागी कलाकार तथा सहयोग गर्ने व्यक्तिहरूलाई पनि मायाको चिनो वितरण गरेको थियो । उक्त महोत्सवमा नारायणी कला मन्दिरले सांस्कृतिक कार्यक्रमको संयोजन गरेको थियो ।