चितवन,माघ १२ । १२औँ राष्ट्रिय जनगणना २०७८ अनुसार चितवनको जनसंख्या २.१० प्रतिशतले बृद्धि भएको छ । तथ्याङ्क विभागले आज सार्वजनिक गरेको प्रारम्भिक नतिजा अनुसार यो दर देशभर सवैभन्दा बढी जनसंख्या वृद्धि हुने जिल्लामध्ये चितवन तेस्रो स्थानमा आइपुगेको छ ।
२०७८ को गणना अनुसार चितवनमा ७ लाख २२ हजार १६८ जनसंख्या पुगेको छ । जसमा ३ लाख ६८ हजार ९७ महिला र ३ लाख ५४ हजार ७१ जना पुरुष रहेका छन् । २०७८ अनुसार परिवार संख्या १ लाख ८२ हजार ८३ पुगेको छ भने जनगणना घर संख्या १ लाख ५३ हजार ६६२ पुगेको छ । जिल्लामा जनघनत्व ३२६ रहेको छ ।
चितवनमा २०६८ अनुसार जनसंख्या ५ लाख ७९ हजार ९८४ रहेको छ ।
अहिलेको नतिजा अक्सर बसोवासको आधारमा प्रारम्भिक तथ्याङ्क सार्वजनिक गरिएको तथ्याङ्क कार्यालय चितवनका प्रमुख यज्ञमुर्ति भण्डारीले बताए ।
विदेश गएकाहरुको जनसंख्या अहिलेको नतिजामा समावेश नभएको र पछि पूर्ण विवरणमा तथ्याङ्क आउने उनको भनाई छ । त्यस्तै जिल्लाको भरतपुर महानगरपालिका धेरै जनसंख्या हुने स्थानीय तहमध्ये देशभर तेस्रो स्थानमा रहेको छ ।
सार्वजनिक नतिजा अनुसार भरतपुर महानगरपालिकाको जनसंख्या ३ लाख ६९ हजार ३७७ पुगेको छ । जसमध्ये महिलाको संख्या १ लाख ८९ हजार ६३३ र पुरुषको संख्या १ लाख ७९ हजार ७४४ रहेको छ ।
जिल्लाका सात स्थानीय तहमध्ये दोस्रो धेरै जनसंख्या भएको स्थानीय तह रत्ननगर रहेको छ ।
रत्ननगर नगरपालिकाको जनसंख्या ९० हजार ९७८ रहेको छ भने जसमा ४६ हजार ८५८ महिला र ४४ हजार १२० पुरुष रहेका छन् ।
हेर्नुहोस तथ्याङ्क
