नवलपुर । गत वर्षको माघ ५ गतेदेखि हिरासतमा किताव कार्यक्रम सुरु गरेको जिल्ला प्रहरी कार्यालय नवलपुरले ‘नागरिक प्रहरी पुस्तकालय’ नै स्थापना गरेको छ ।
अध्ययनलेनै मानिसलाई सकारात्मक सोचको विकास गर्न मद्दत मिल्ने भन्दै पुस्तकालय स्थापना गरेको प्रहरी उपरीक्षक प्रकाश मल्ले जानकारी दिए ।
कार्यालय परिसर भित्र नागरीक र प्रहरी बीचको समन्वयलाई सुदृढ गर्न र बाह्य ज्ञानको सीमालाई बढाउने ‘नागरिक–प्रहरी पुस्तकालय’ कार्यक्रम सुरु गरिएको उनको भनाई छ ।
यसलाई सफल पार्न कावासोती नगरपालिका, गैडाकोट नगरपालिका, मध्यबिन्दु नगरपालिका र विनयीत्रिवेणी गाँउपालिकाको महत्वपूर्ण सहयोग गरेको प्रहरीको भनाई छ । पुस्तकालयमा प्रहरी कर्मचारीहरु र आम नागरिकको लागि समेत पहुँच हुनेगरी खुला राखिने एसपी मल्लको भनाई छ ।
अहिले पुस्तकालयमा कानुन, उपन्यास, काव्य, कथा लगायत आख्यायन र गैह्र आख्यायन गरी करिब १ हजार थान पुस्तक रहेको र आवश्यकता अनुसार पुस्तकको संख्या थप गर्दै लग्ने सूचना अधिकारी एवम डीएसपी दिलीप कुमार गिरीले जानकारी दिए ।
जिल्ला प्रहरी कार्यालय नवलपुरले यस अघि मातहतका ५ प्रहरी युनिटमा हिरासतमा पुस्तक कार्यक्रम संचालनमा ल्याइसकेको छ । जहाँ सकारात्मक सोच परिवर्तन गराउन मद्दत मिल्ने पुस्तक अध्ययनगरी समय विताउन मिल्ने व्यवस्था रहेको छ ।
