चितवन । ओमिक्रोनको उच्च जोखिममा चितवन पनि रहेको भन्दै जिल्ला प्रशासन कार्यालय चितवनले सवै मेला महोत्सव स्थगित गर्ने निर्णय गरेको छ । आज प्रशासनमा बसेको सर्वपक्षिय भेलाले पुस २५ गतेदेखि सुरु भएको १३औँ चितवन महोत्सव दुई दिन चल्न दिने र भोलि उद्घाटन गर्न तयार पारिएको रत्ननगर महोत्सव सहित सवै मेला स्थगित गर्ने निर्णय गरेको सहायक प्रमुख जिल्ला अधिकारी चिरन्जीवी शर्माले जानकारी दिनुभयो ।
ओमिक्रोनका संक्रमित जिल्लामा नभेटिएपनि जोखिम उच्च रहेको भन्दै भौतिक रूपमा २५ जना भन्दा बढी उपस्थित भई हुने सबै प्रकारका सभा, जुलुस, सम्मेलन, प्रदर्शन, भेला, जावा, महोत्सव सञ्चालन गर्न रोक लगाउने निर्णय गरिएको शर्माको भनाई छ । साथै संचालमा भई रहेको चितवन महोत्सवको हकमा पौष २९ गते पुर्ण रुपमा बन्द गर्ने गरी पुस २८ गते सम्म व्यवस्थापनको लागी समय उपलब्ध गराउने र देवघाटमा लाग्ने माघे सक्रान्ति (मकर) मेला पुर्ण रुपमा सन्चालनमा रोक लगाउने निर्णय गरिएको हो । भोलि उद्घाटनको तयारी गरिएको रत्ननगर महोत्सव समेत रोकिने भएको छ।
त्यस्तै जिल्ला स्वास्थ्य कार्यालय मार्फत नियमित खोप केन्द्रहरुमा खोपलाइ अभियानकै रुपमा थप प्रभावकारी रुपमा अगाढि वढाउने, सार्वजनिक स्थानहरुमा साविकमा चलाइएका निशुल्क एन्टीजेन टेष्ट बुथहरु स्थानिय तहहरुमार्फत पुन संचालन गर्ने, माघ ७ गते देखि सार्वजनिक स्थानहरुमा (कार्यालय, होटल, रेष्टुरेन्ट, सिनेमा हल,रंगशाला ) प्रवेश गर्दा र सार्वजनिक सेवा प्राप्त गर्दा आन्तरिक उडानमा जादा अनिवार्य रूपमा कोभिड विरुद्धको खोप लगाएको कार्ड (मोबाइलमा फोटो भएपनि हुने ) अनिवार्य गर्ने निर्णय गरिएको छ ।
त्यस्तै सबै आधारभुत तथा माध्यमिक विद्यालयहरु संचालनको हकमा नेपाल सरकार शिक्षा मन्त्रालयको निर्णयानुसार गर्ने र विश्वविद्यालय, क्याम्पस, लगायत सबै शैक्षिक प्रतिष्ठानका पूर्व निर्धारित सेमेप्टर र वार्षिक परीक्षाहरु जनस्वास्थ्य र सुरक्षा मापदण्ड पालना हुने गरी जेड आकारमा बसाई व्यवस्था गरी संचालन गर्ने निर्णय भएको छ।
उद्योग कलकारखाना, व्यापार व्यवसाय, बैंक तथा वित्तीय संस्थाहरु, जनस्वास्थ्यका निर्धारित मापदण्ड अनिवार्य रूपमा पालना गर्ने सुनिश्चितता गरी सञ्चालन गर्ने र जिल्ला भित्र संचालन हुने सार्वजनिक तथा निजी सवारी साधनमा सिट क्षमता भन्दा बढी यात्रु नराख्ने,सबै यात्रुहरुले अनिवार्य रुपमा मास्क लगाउने, मास्क नलगाउने यात्रुलाई सवारी साधनमा प्रवेश गर्न नदिने, चालक र सहचालकले अनिवार्य मास्क लगाउने लगायतका निर्णय भएको सहायक सीडीओ शर्माले जानकारी दिनुभयो ।
