ढोडेनी । हिजो पुष २४ गते शनिवार चुनाव भएसँगै गैँडाकोट नगरपालिका वडानम्वर ३ मा रहेको देउराली सामुदायिक वन उपभोक्ता समूहको नयाँ नेतृत्वले पूर्णता पाएको छ । हिजो विहान ८ बजेदेखि ३ बजेसम्म भएको निर्वाचनमा कुल २८० मत खसेको थियो ।
वनको उपाध्यक्ष, सचिव र कोषाध्यक्षमा सहमति नभएपछि चुनाव भएको हो । उपाध्यक्ष पदमा एकबहादुर गुरुङ विजयी हुनुभएको छ । उहाँले १३९ मत प्राप्त गर्दा प्रतिद्वन्द्वी दिलवहादुर भुजेलले १२७ मत प्राप्त गर्नुभयो । वनको सचिवमा कृष्ण माया पोख्रेल १५० मत सहित बिजयी हुँदा उहाँको प्रतिद्वन्द्वी राममाया थापाले ११६ मत ल्याउनुभएको थियो ।
त्यस्तै कोषाध्यक्षमा कृष्ण बहादुर बिक २१७ मत सहित विजयी हुनुभएको छ । उहाँको प्रतिद्वन्दी बद्री प्रसाद रिमालले ५१ मत मात्र प्राप्त गर्नुभएको निर्वाचन समिति संयोजक कृष्ण प्रसाद खनालले जानकारी दिनुभयो।
पुष १६ गते सुरु भएको २०औँ साधारण सभा तथा आठौँ अधिवेशनबाट अध्यक्षमा भने यसअघिनै नरवहादुर मुक्मी चयन भइसक्नुभएको छ । त्यस्तै सह–सचिवमा जितवहादुर गुरुङ चयन भइसक्नुभएको छ । बिष्णुहरि अधिकारीले सहयोग गरे पछि सहसचिवमा सहमति भएको थियोे ।
कार्यसमिति सदस्यहरुमा पनि यसअघिनै सर्वसम्मत चयन भइसकेका छन् । जसमा नरबहादुर सिँजाली,कृष्णवीर गुरुङ,कल्पाना गुरुङ, इन्द्र लाल भुजेल, मोती मायाँ पुलामी मगर, शान्ति खण्डलुक, पञ्चमाया गुरुङ, मिनु परियार, विष्णु परियार, मनिषा पौडेल, डिल्लिराम अधिकारी र शर्मिला ढकाल रहेका निर्वाचन समिति संयोजक कृष्ण प्रसाद खनालले जानकारी दिनुभयो ।
त्यस्तै लेखा संयोजकमा ठाकुर प्रसाद रिमाल र लेखा सदस्यमा श्रीजना मगर सर्वसम्मत चयन भइसक्नुभएको छ । वनमा ३४६ जना उपभोक्ता सदस्य रहेका छन् । वनको १७ सदस्यीय नयाँ कार्यसमिति वन्नेछ । सदस्यमा निवर्तमान अध्यक्ष स्वतह र एक जनालाई सदस्यमा मनोनित गरिनेछ । नयाँ कार्यसमितिको समयावधि ३ वर्षको हुनेछ ।
नव निर्वाचित कार्य समिति को सपथ ग्रहण पनि आजै दिउँसो ३ बजे रहेको निर्वाचन संयोजक खनालले जानकारी दिनुभयो।
