नवलपुर । नेकपा एमाले नवलपुरको आठौँ अधिवेशन हिजोेदेखि कावासोतीमा सुरु भएको छ । हिजो उद्घाटन भएको अधिवेशनले आज नवलपुर हाँक्ने नयाँ नेतृत्व चयन गर्दै सकाउने तयारी तीव्र छ ।तर सर्वसम्मत गराउन सकस भइरहेको छ ।
सर्वोच्च अदालतले एकता भएको नेकपा पूर्ववत फर्काएपछि छिन्नभिन्न भएको पार्टीमध्येको नेकपा एमालेले एकताको अधिवेशन गर्दैछ । यो पटक नेकपा माओवादी केन्द्र परित्याग गरि नेकपा एमालेमै रहेकालाई समेत समायोजन गरि एकताको सन्देश दिन सवै नेताहरु लागिरहेका छन् ।
तर नवलपुरमा भने नेतृत्वमा सर्वसम्मत गराउन सकस देखिएको छ । अध्यक्ष पदमा कार्यवाहक अध्यक्ष एवम गण्डकी प्रदेश सभा सदस्य रोशन गाहा मगर र वर्तमान सचिव जीवन श्रेष्ठले दावी गरेपछि सर्वसम्मत गराउने पहल भइरहेको हो । यद्यपी दुवै जनाले आफ्नो दावीबाट पछि नहट्दा अध्यक्ष चयनमै सकस भइरहेको हो ।
पार्टी अध्यक्ष तिलक महत केन्द्रीय सदस्यमा पुगेपछि कार्यवाहक अध्यक्षको जिम्मेवारी पाउनुएका रोशन गाहाले पूर्णरुपमा अध्यक्षको जिम्मेवारी पाउनबाट बन्चित भइरहेको भन्दै अध्यक्षमा दावी गरिरहनुभएको स्रोतको भनाई छ । यद्यपी जीवन श्रेष्ठले रोलक्रममा पनि आफू अध्यक्ष हुनुपर्ने दावी सहित कायमै रहनुभएपछि सर्वसम्मत गराउने प्रयास जारी रहेको हो । सर्वसम्मतमा छोड्ने कसले भन्ने प्रश्न खडा छ । दुवै उम्मेदवारहरु सहभागी प्रतिनिधिहरुसँग पनि राय सल्लाह लिइरहेको स्रोतको भनाइ छ ।
६ वर्षे कार्यकाल रोशन गाहाले जिम्मेवारी सह्माल्नु भएको र यस पटक श्रेष्ठलाई अध्यक्ष दिँदा हुने मत बढिरहेको दावी गरिएको छ ।
तर गाहाले आफू पूर्णरुपमा अध्यक्ष नभई कार्यवाहक मात्रै भइरहेकाले उक्त पदमा बसेर जिम्मेवारी निभाउन चाहेको बताइएको छ । अध्यक्षको टुँगो लागेपछि मात्रै अन्य पदहरुमा छलफल हुने एक प्रतिनिधिले बताए ।
१०५ सदस्यीय जिल्ला कमिटि चयन गर्न करिव ७ सयको हाराहारीमा प्रतिनिधिको सहभागीता रहेको छ ।
