चितवन । चितवनको सौराहा स्थित होटल मनोलिसामा राष्ट्रिय ख्रीष्टियन महासघ नेपालको १४औँ राष्ट्रिय भेला आजदेखि सुरु भएको छ । कार्यक्रममा बोल्दै जनता समाजवादी पार्टीका नेता आङकाजी शेर्पाले टुँडीखेलमा क्रिशमस मनाउन सुझाव दिएका छन् । उनले सार्वजनिक स्थानमा पर्व मनाए यसको महत्व अन्यलाई पनि थाहा हुने बताए ।
हिन्दु धर्मसँग सम्वन्धीत पर्व टुँडिखेलमा मनाउन हुने ख्रीष्टियन धर्मको पर्व मनाउन किन नहुने भन्दै उनले धर्म निरपेक्ष राष्ट्रलाई व्यवहारमा उतार्न माग गरे । साथै महासँघलाई राजनीति पार्टी बनाउन उनको सुझाव थियो । राज्यसत्तामा पुगेमात्रै माग सम्वोधन नहुने भन्दै कि राजनीतिक पार्टी खोल्न कि क्रिश्चियन धर्मवारे वकालत गर्ने पार्टीलाई जिताउने उनको आह्वान थियो । उनले भने,“मलाई भोट दिएर जिताई सत्तामा पुर्याए तीन दिन विदा दिनेछु । चौतारीमा बसेर वाइवल पढ्ने वातावरण बनाउदै गाउँगाउँमा क्रिश्चियन धर्मको सन्देश फैलाउने वातावरण बनाउँछु ।”

पौष २२ गतेसम्म चल्ने भेलाले क्रिश्चीयन धर्मालम्बीहरुलाई मूल धारमा ल्याउने गरी काम गर्न रणनीति बनाउने अध्यक्ष सीवी गहतराजले बताए ।नेपाली जगतले नसोचेको नयाँ रणनीति बनाएर अघि बढ्ने बताउँदै घर्म निरपेक्ष राष्ट्रको व्यवहारिक कार्यान्वयनका लागि एलायन्स बनाएर सरकारलाई दबाब दिने भन्दै धर्मनिरपेक्ष राष्ट्र हुनुपर्नेमा सनातन शब्द राखी षडयन्त्र गरेको बताउँदै धर्म व्यक्तिको हुने तर राज्यको नहुनेगरी व्यवहारीक कार्यान्वयन हुनुपर्नेमा उनको जोड थियो ।
भेलाले नयाँ रणनीति बनाएर राज्यलाई ख्रीष्टियन महासघसँग भएको तीन बुदे र ६ बुदे सहमति कार्यान्वयन गराउन वाध्य पार्ने गहतराजको भनाइ थियो ।
कार्यक्रममा पूर्व गृहराज्यमन्त्री रिजवान अन्सारीले धर्म निरपेक्षमा सनातन शब्द राखेर अन्य धर्ममान्नेहरुर्लाइ अपमान गरेको भन्दै सनातन हटाउन माग गरे । साथै राजा र हिन्दुराज्य कुनेै हालतमा वन्न नसक्ने बताउँदै जनतालाई आवश्यक ऐन कानुन जनता आफैले निर्माण गर्ने उनको भनाई थियो ।
हाम्रो अभियान, नेपाली ख्रीष्टयन समुदायको स्वाभिमान र पहिचान भन्ने नारा सहित होटल मोनालिसामा सुरु भएको भेलामा देशभरबाट प्रतिनिधिहरुको उपस्थिती रहेको छ ।
कार्यक्रमको संचालन उद्धव चिमोरियाले गरेका थिए ।कार्यक्रममा दलित पार्टीका अध्यक्ष मेघराज विक, नेकपा समाजवादीका अध्यक्ष राजु कार्की,एन.सी.एफका अध्यक्ष हनोक तामाङ, सहअध्यक्ष टेक विक्रम हिताङ्ग,प्रवासी तथा गैह्र आवासीय विभाग प्रमुख डा.प्रकाश मेघी गुरुङ,डा.फिलेमोन खड्का क्षेत्री लगायतको उपस्थिती रहेको थियो ।