चितवन । चितवनको रत्ननगर नगरपालिका वडा नम्वर ३ को कार्यालयले सामुदायिक विद्यालयमा अध्ययन गर्ने छात्राहरुलाई साइकल सहयोग गरेको छ । सो वडा भित्र रहेको बेल्सी आधारभुत विद्यालयका छात्रालाई साइकल वितरण गरिएको वडाअध्यक्ष गुप्तनाथ भट्टराइले जानकारी दिनुभयो ।
कार्यक्रमका प्रमुख अतिथि मेयर नारायण वन र वडाध्यक्ष भट्टराईले विद्यार्थीहरुलाई साइकल हस्तान्तरण गर्नुभएको हो । सो अबसरमा मेयर वनले सामुदायिक विद्यालयमा पढ्ने नगर भित्रका छोरीहरुलाई साइकल वितरण सुरु गरेको जानकारी दिनुभयो । सबै सामुदायिक विद्यालयलाई बस प्रदान गर्न सक्ने अबस्था नरहेपछि पहिलो चरणमा सामुदायिक विद्यालयमा पढ्ने छात्राहरुलाई साइकल दिन सुरु गरिएको उहाँको भनाई छ ।
आफ्नो बाबु नानीलाई निजी विद्यालयमा पढाउने शिक्षकहरुलाई जागिर छाड्न समेत उहाँको आग्रह थियो ।
उक्त विद्यालयमा कक्षा ५ देखि ८ सम्म अध्यायनरत ३७ जना छात्रालाई साइकल वितरण गरिएको हो । सामुदायिक विद्यालयमा विद्यार्थीको आर्कषण बढाउन र शैक्षिक गुणस्तर सुधार गर्न साइकल प्रदान गरिएको वडाअध्यक्षको भनाई रहेको छ ।
कार्यक्रममा वडा नम्बर १० का वडाध्यक्ष केशब आचार्य,कार्यपालिका सदस्य मीना गिरी, वडा सदस्यहरु किशोरबाबु पुरी ,प्रेमकुमारी चौधरी,वडा सचिव चन्द्रमणी आचार्य,विद्यालयका प्रधानाध्यापक शालिग्राम ढकाल,नेकपा एमालेका केवल न्यौपाने,नेपाली कांग्रेसका छविलाल घिमिरे,समाजसेवी उत्तम आचार्य,राजेन्द्र कोइराला,नगर शिक्षा अधिकृत राजेन्द्र बराल,विद्यालय स्तरीय बाल क्लबकी अध्यक्ष समीक्षा खतिवडा लगायतको उपस्थिति रहेको थियो ।