चितवन । चितवनमा मानव अधिकार उल्लघंनका घटनामा कमि आएको छ । वर्ष २०२० को तुलनामा २०२१ १८ वटा घटनाले कमि आएको अनौपचारिक क्षेत्र सेवा केन्द्र इन्सेक चितवनका प्रतिनिधि दिपेन्द्र अधिकारीले जानकारी दिए ।
वालिका बलात्कारको घटनामा कमी आएको छ भने महिला बलात्कारको घटनामा भने बृद्धि भएको छ । इन्सेक चितवनले आज पत्रकार सम्मेलन गरी मानवअधिकार उल्लघंनका घटनाहरु सार्वजनिक गरेको हो ।
इन्सेक चितवनका प्रतिनिधि अधिकारीले जिल्लामा वर्ष २०२० को तुलनामा यो वर्ष मानवअधिकार उल्लघंनका घटनामा कमी आएको बताए । वर्ष २०२० मा ११० वटा घटना घटेकोमा यो वर्ष कुल ९२ वटा घटना भएको उनको भनाई छ ।
अधिकारीका अनुसार यो वर्ष जिल्लामा २९ जना वालिका र १६ जना महिला बलात्कृत भएका छन् । गएको वर्ष भने वालिका बलात्कारका ३६ वटा र महिला बलात्कारका १५ वटा घटना दर्ता भएको थियो । यो वर्ष बालिका बालात्कारको घटनामा ७ वटाले कमी आउँदा महिला बलात्कारको घटना १ ले बढेको छ । शिक्षित र ७८औँ जिल्ला भनेर चिनिने चितवनमा जघन्य अपराधका घटनाको संख्या धेरै हुनु चिन्ताको विषय रहेको अधिकारीले बताए । कुल घटनामा कमी आएपनि सन्तोष हुने ठाउँ नरहेको उनको भनाई छ ।
त्यस्तै वालविवाहको १ वटा, वालिका वेचविखनको ३ वटा,वाल यौन दुव्र्यवहारको एक वालक सहित १८ वटा घटना भएका छन् । यसरी वालअधिकारको हनन्तर्फ कुल ५१ व्टा घटना दर्ता भएका छन् । त्यस्तै जिल्लामा महिला हिँसाका १ वटा, वहुविवाहका १० वटा,बलात्कारका १६ वटा, बलात्कार प्रयासको ७ वटा र महिला वेचविखनको ३ वटा घटना भएको उनले बताए । यसरी महिला अधिकार हनन्का ३७ वटा घटना दर्ता भएका छन् । त्यस्तै जिल्लामा हत्याका ४ वटा घटना भएका छन् । जसमध्ये हानेर २ वटा, हतियार प्रयोग गरी १ वटा,कसले हत्या गरेको भन्ने खुलेको छैन।
गत वर्षमा ११० वटा मानव अधिकार उल्लघंनका घटना भएका थिए। जसमा महिला बलात्कारका १५ वटा, बलात्कार प्रयासका ७ वटा, बालिका बलात्कारका ३६ वटा, बालिका बलात्कार प्रयासका ५ वटा, ९ जनाको (४ महिला, ५ पुरुष) हत्या, बाल यौन दूव्र्यवहारका ६ वटा, बहुविवाहका १४,आत्महत्या दुरुत्साहनका ३ वटा,मानव वेचविखनका ४, वम विष्फोटका १,हातहतियार सम्वन्धी १ र राज्यविरुद्ध अपराधिका ५ वटा घटना भएका थिए ।
कार्यक्रममा बोल्दै प्रमुख अतिथि जिल्ला प्रहरी कार्यालय चितवनका प्रमुख प्रहरी उपरीक्षक एसपी ओम प्रसाद अधिकारीले शिक्षाको बढ्दो चेतनाले निवेदन दर्ता बढेको बताए । तर शिक्षित जिल्लामा यतिका घटना हुनु राम्रो नभएको भन्दै अपराध न्यूनिकरणमा प्रहरी निरन्तर लागेको बताए। पछिल्लो समय सामाजिक संजालका कारण अपराधिक घटनाहरु बढ्दै गएको र न्यूनिकरण सहित समाजलाई शान्त राख्न सवै एकजुट हुन आवश्यक भएको बताए । व्यवहारीक दृष्टिकोणबाट परिवार भत्कनबाट जोगाउँदै मेलमिलापका काम समेत भएको उनको भनाई छ । प्रहरीले परिवारलाई भत्काउने भन्दा जोड्नेगरी काम गरिरहेको र गम्भिर अपराध गर्नेहरुलाई कानूनी दायरामै ल्याएरै छाड्ने उनको प्रतिवद्धता थियो ।
