नवलपुर। राष्ट्रिय प्रजातन्त्र पार्टीका अध्यक्ष राजेन्द्र लिङ्देनले अहिलेका नेताहरुप्रति जनताले विस्वास गर्न छाडेको बताएका छन् । देशको राजनीति सह्माल्ने नेताहरु भएपनि तीनै नेताहरुप्रति जनताको विस्वास भने घट्दोक्रममा रहेको र यो गम्भीर विषय भएको उनको भनाई थियो ।
पार्टीको गण्डकी प्रदेश सम्मेलन अगाडी पुर्वी नवलपरासीको कावासोतीमा आयोजित आमसभालाई सम्बोधन गर्दै अध्यक्ष लिङ्देनले सो कुरा बताएका हुन् । उनले भने,“संसद संसद जस्तो छैन, अदालत अदालत जस्तो छैन । यी सवैलाई ठेगानमा ल्याउने राजनीति हो तर राजनीतिनै लिक मा छैन । राजनीतिलाई लिकमा ल्याउने नेताहरुले हो तर नेताप्रति जनताको विस्वास कम हुँदै गएको छ ।”
काँग्रेसको महाधिवेशनमा आफूले दिएको अभिव्यक्तिको प्रसंग उल्लेख गर्दै लिङ्देनले आफूले पनि भोगेको कुरा बताएको र नेताहरु सच्चिन जरुरी रहेको दोहोर्याए । ३० वर्षदेखि देश काँग्रेस एमालेको वन्धक वनेको भन्दै भ्रष्टचारको काण्ड वाहिरिने गरेपनि खोज्दै जाँदा सत्तापक्ष र प्रतिपक्षकै संलग्नता देखिने गरेको उनको भनाई थियो ।
उनले प्रजातन्त्र, गणतन्त्र र धर्म निरपेक्षको नाममा कांग्रेस, एमाले र माओवादीले मुलुकलाई बन्धक बनाएको आरोप लगाए । अब मुख्य राजनितिक शक्तिको रूपमा प्रजातन्त्र पार्टीलाई विश्वास गर्न उनको आह्वान थियो । साथै आगामी चुनावबाट आफ्नो पार्टी एकनम्वरको पार्टी बन्ने समेत उनको भनाई थियो ।
विदेशीको चलखेलमा परेर गणतन्त्र र धर्म निरपेक्ष बनाउने राजनितिक दललाई अब जनता आफैँले पाखा लगाउने लिङदेनको भनाई थियो ।

आज र भोली पुर्वी नवलपरासीको कावासोतीमा हुन लागेको प्रदेश सम्मेलनले आगामी कार्यनिति र प्रदेश राजनितिक दस्तावेज तयार पार्ने राप्रपा नेपाल पुर्वी नवलपरासीका अध्यक्ष विष्णु अधिकारीले जानकारी दिए ।