चितवन । यही पुष २५ गतेदेखि माघ ४ गतेसम्म नारायणी नदी किनारमा हुन गइरहेको चितवन महोत्सव २०७८ का सवै स्टल बुकिङ भएका छन् । कोभिड महामारी कम भएसँगै गर्न लागिएको महोत्सवमा स्टल राख्न चाहानेहरु बढेको उद्योग वाणिज्य संघ चितवनका कार्यकारी निर्देशक नीलकुमार केसीले बताए ।

केसीका अनुसार महोत्सवका राखिने ३५० वटै स्टलहरु बुक भएका हुन् । अझै माग बढिरहेको तर स्टल थप्ने कि नथप्ने भन्ने विषयमा छलफल भइरहेको उनको भनाइ छ । यो पटक पनि छरपष्ट रुपमा भन्दा विषयत स्टलहरु व्यस्थित हुनेगरी डिजाइन भइरहेको केसीले बताए । नौलो प्रयोगका रुपमा डोम बनाइदैछ जहाँ अटोका मात्रै स्टल रहनेछन् । १० वाइ १० का २० वटा स्टलहरु हुने र आवश्यकता अनुसार ७० वटा सम्मका स्टल डोमभित्र बन्न सक्नेछन् । त्यस्तै हस्कलाका एकै ठाउँमा, कृषिका अर्को एकै लहरमा हुनेगरी सवैको विषयगत क्षेत्रअनुसार स्टल रहनेछन् ।

स्टलको स्थान अनुसार मूल्य कायम गरिएको स्टल बुकिङ गर्न रोल्पा,दाङ,जुम्लाबाट समेत आएका छन् । यो पटक जुम्लाको दाल,सीमी,मार्सी चालम समेत पाइने भएको छ ।
महोत्सवमा स्टल राख्न चाहाने महिला उद्यमीहरुलाई विशेष छुट रहेको र यदी उद्योग वाणिज्य संघ चितवनका सदस्य रहेकाहरुले स्टल राख्न चाहेमा मूल्यमा २० प्रतिशत र अन्य उद्योग वाणिज्य संघमा सदस्य रहेकालाई समेत १० प्रे स्टल राख्न चाहेमा मूल्यमा २० प्रतिशत र अन्य उद्योग वाणिज्य संघमा सदस्य रहेकालाई समेत १० प्रतिशत छुट स्टल बुकिङका समय प्रदान गरिएको केसीको भनाई छ ।

महोत्सव मूल आयोजक समितिका अध्यक्ष राजु श्रेष्ठले महोत्सव पूर्व प्रधानमन्त्री एवम नेकपा माओवादी केन्द्रका अध्यक्ष पुष्पकमल दाहाल प्रचण्डले उद्घाटन गर्ने बताए । महोत्सवको तयारी तीव्र पारिएको र त्यसका लागि ३८ वटा कार्यगत समिति निर्माण भएर काम भइरहेको श्रेष्ठको भनाई छ । करिव ५ लाख दर्शकले अवलोकन गर्ने उनले बताए । समुद्घाटनका दिन हेलिकप्टरबाट पुष्पवृष्टी समेत गरिने श्रेष्ठको भनाई छ ।

उद्यमी व्यवसायीको हक,हितको संरक्षण संवद्र्धन र प्रवद्र्धन गर्दै चितवन जिल्लाको कृषि,शिक्षा,स्वास्थ्य,पर्यटन लगायत समग्र आर्थिक,सामाजिक र सांस्कृतिक विकासका साथसाथै पर्यटनका नयाँ सम्भावनाको समेत महोत्सवमा खोजी गरिने अध्यक्ष श्रेष्ठले बताए । २०१६ साल माघ १९ गते श्रीपञ्चमीका दिन स्थापना भएको उद्योग वाणिज्य संघ चितवनले २०५३ सालदेखि प्रत्येक २ दुई वर्षको फरकमा महोत्सव गर्दै आइरहेको छ ।

पालो अनुसार २०७७ सालमा महोत्सव गर्नुपर्ने भएपनि कोभिड १९को महामारीका कारण स्थगित भएको थियो । अहिले धेरै नागरिकले खोप समेत लगाएपछि प्रशासन र स्वास्थ्य कार्यालयको समन्वयमा महोत्सव गर्न लागिएको आयोजकले जनाएको छ।

महामारीको जोखिमलाई ध्यान दिएर ठाउँ फराकिलो गराउने उद्देश्यले ३५० वटा मात्रै स्टल राखिएको आयोजको भनाई छ ।

१३औँ संस्करणको चितवन महोत्सव थप ऐतिहासिक हुने दावी अध्यक्ष श्रेष्ठको छ । चितवन महोत्सव अन्य जिल्लाका लागि सिकाइको थलो समेत भएकाले त्यो सहित कृषि र पर्यटनका नयाँ आयाम थप गर्न मद्दत मिल्ने दावी गरिएको छ ।