चितवन । वागमती प्रदेशले जम्बो मन्त्रीमण्डल बनाएको छ । जनताको करबाट तलवभत्ता खानेगरी यसरी मन्त्रीहरु थपिदा राज्यको व्ययभारमात्रै बढ्ने भन्दै चौतर्फी आलोचना भएको छ ।
नेकपा एकीकृत समाजवादीका नेता राजेन्द्र पाण्डे मुख्यमन्त्री छन् । तर गठवन्धनबाट बनेको उनको सरकार टिकाउन मन्त्रालय फुटाएर जम्बो मन्त्रीमण्डल बनाएका हुन् ।
नवनियुक्त मन्त्री र राज्यमन्त्रीले शपथ ग्रहण गरेका छन् । मन्त्रीहरूलाई प्रदेश प्रमुख यादव शर्माले र राज्यमन्त्रीहरूलाई मुख्यमन्त्री राजेन्द्र पाण्डेले शुक्रवार बेलुकी शपथ ग्रहण गराएका हुन्।
थपिएका मन्त्रीहरूमा उद्योग, वाणिज्य तथा आपूर्ति मन्त्री मिलनबाबु श्रेष्ठ, संस्कृति तथा पर्यटन मन्त्री दीपेन्द्र श्रेष्ठ र भूमि व्यवस्था, सहकारी तथा गरिबी निवारण मन्त्री बलराम पौडेल रहनुभएको छ । यस्तै राज्यमन्त्रीहरूमा भौतिक पूर्वाधार विकास राज्यमन्त्री सन्तबहादुर प्रजा, स्वास्थ्य राज्यमन्त्री कल्पना नेपाली, उद्योग, वाणिज्य तथा आपूर्ति राज्यमन्त्री रजनी अमात्य जोन्छ रहेका छन् ।
यससँगै वाग्मती प्रदेशमा १४ जना मन्त्री र चार जना राज्यमन्त्री गरी १८ जना मन्त्री भएका छन् । नियुक्त मन्त्री तथा राज्यमन्त्रीहरू सवै सत्तागठबन्धको दल नेपाली कांग्रेसको तर्फबाट नियुक्त भएका हुन् । मुख्यमन्त्री पाण्डेले चौथो पटक मन्त्रिपरिषद् विस्तार गरेका छन् । यो सँगै उनको चौतर्फी आलोचना भएको छ । संघीयतालाई खर्च बढाउने र व्यक्ति र दलको इच्छा पूरा गर्ने माध्यममात्रै बनाइएको भनी आलोचना सुरु भएको हो ।
मन्त्रालय बढाएर बस्ने ठाउँसमेत नहुँदा एउटै भवनमा विभिन्न मन्त्रालय बनाएको भन्दै आलोचना भइरहेपनि पाण्डेले थप मन्त्री र राज्यमन्त्री थपेका हुन् ।
