नवलपुर,अमलटारी । नेपाल पत्रकार महासंघ गण्डकी प्रदेश समितिले नवलपुरका पत्रकारहरूलाई दिएको तालिम आज सम्पन्न भएको छ। गण्डकी प्रदेशको कानुन संचार तथा प्रदेश सभा मामिला मन्त्रालयको आर्थिक सहयोगमा पुष ७ गतेदेखि कावासोतीको अमलटारीमा सुरु भएको तालिम आज सकिएको हो ।
पत्रकार तीर्थ कोईराला र फोटो पत्रकार चन्द्रशेखर कार्कीले प्रशिक्षण दिएका थिए । समापन कार्यक्रममा बोल्दै प्रशिक्षक तीर्थ कोईरालाले सीप लिएपछि त्यसलाई आफ्नो पेशामा प्रयोग गरि सुधार्दै लैजान सुझाव दिए ।पत्रकार सवै विषयमा विज्ञ नभएपनि सवै विषयबारे ज्ञान हुन भने जरुरी रहेकाले अध्ययनशील हुन पनि उनको आग्रह थियो ।
अर्का प्रशिक्षक चन्द्रशेखर कार्कीले प्रविधिको विकाससंगै एउटा पत्रकार क्यामेरा सगै मोवाईल लगायतमा अपडेट हुन जरुरी रहेको र व्यवसायिकतामा लैजान दक्ष हुन जरुरी रहेको बताए ।
तालिम गण्डकी प्रदेशका अन्य सवै जिल्लामा संचालन गर्ने नेपाल पत्रकार महासंघ गण्डकी प्रदेश समितिका महासचिव गोविन्द सुवेदीले जानकारी दिए ।
आफूहरु नेतृत्वमा आउनासाथ पत्रकारहरुलाई दक्ष गराउन तालिम संचालन गर्ने प्रतिवद्दता पूरा गरेको उपाध्यक्ष साेनी शर्माकाे भनाइ थियने।नवलपुरको पत्रकारितामा महिलाहरुको सहभागिता उत्साहजनक रहेको उनले बताइन्।
कार्यक्रममा बोल्दै अध्यक्ष नारायण शर्माले आफ्नो नेतृत्वको महासंघ पत्रकारको हितमा निरन्तर काम गर्ने बताए । आफ्नो पेशामा रहदा सधै मर्यादा र पत्रकारको आचारसहिता भित्र रहेर काम गर्न उनको आग्रह थियो ।
तालिम प्रभावकारी रहेको भन्दै आगामी दिनमा पनि क्षमता विकास गर्ने अर्को विधाको तालिम संचालन गर्न सहभागीहरुले आग्रह गरेका थिए । अहिलेको तालिमबाट पत्रकारिताका विभिन्न क्षेत्र र तिनीहरुको पहिचान तथा संचालनवारे ज्ञान मिलेको सहभागी मध्यका गोमा शर्मा र दिप काफ्लेको भनाई थियो । सहभागीहरुलाई प्रमाणपत्र प्रदान गरिएको थियो ।
